ЙӦРА ГӦТЫР

Ӧтчыд Рака му вылын кокасис. Лёльӧ-нидзув корсяліс. Видзӧдӧ: мыйкӧ дзирдалӧ. Кыскис да шай-паймуні — зарни чунькытш. Ныр йылас сюйис, юрнас гогйӧдлӧ. Мӧд Рака юалӧ:

— Мый нӧ юрнад гогйӧдлан, Рака чой?

— Мый нӧ мем не гогйӧдлыны, верӧс сайӧ муні, чунькытша ӧні ме.

— Збыль али мый? Код сайӧ нӧ петін?

— Йӧра сайӧ, со тай локтӧ менам верӧсӧй. Ӧні ог нин кут лэбавны, Йӧра менӧ сюр вылас кутас новлӧдлыны. Быдсяма шыбластӧ ме ог нин кут сёйны. Йӧра менӧ медся чӧскыднас вердны-юктавны кутас.

— Збыль али мый?

Лэбис Рака и Йӧралы сюр вылас пуксис.

Йӧраыд эськӧ и скӧрмис, юрнас пыркӧдӧ, а Рака гыжъяснас шашаритчӧма, он уськӧд. Сӧмын зарни чунькытшсӧ ныр йылас кутӧ, мед эськӧ оз вош. Сизьдыштіс Йӧралы нырас.

— Нуӧд менӧ ресторанӧ, верд да юктав.

Нинӧм вӧчны Йӧралы, нуӧдіс Ракаӧс ресторанӧ.

— Кысь нин, Рака, татшӧм Йӧрасӧ аддзин? — юалӧны мойяс.

— Асланым вӧрысь, ӧні сійӧ менам верӧс, со аддзанныд зарни чунькытшсӧ?

— Нолы, Йӧрук, муса верӧс, кор, медым ваясны меным нек, нӧк.

Лои Йӧралы кывзысьны.

Сёйис, юис Рака, Йӧралы нинӧм эз коль. Сэсся шуӧ:

— Ноко, Йӧра, йӧктыны пет!

Йӧра кокъяснас изъяс вылын гымӧдӧ, а Рака сюр вылас йӧктӧ да сьылӧ.

— Йӧра верӧс менам бур.

Лӧсьыд сылӧн паськыд сюр.

Кӧсъя — лэдза, кӧсъя — ог.

Абу менам печаль-шог.

Йӧра думайтӧ, вот ӧд сийӧсасис Ракаыд. Шуӧ:

— Лэдз менӧ, Рака, кутшӧм тэ мен гӧтыр, ми тэкӧд абу гоз.

— Ещӧ кӧ мыйкӧ шуан, синъястӧ кокала. Ньӧб меным зарни сапӧг гоз.

— Мый вылӧ нӧ ньӧба?

— Мун рынокӧ да мый вылӧ кӧсъян, сы вылӧ и ньӧб.

Муніс Йӧра рынокӧ.

— Деньгаыд кӧ абу, вузав сюртӧ, — шуӧ рака.

Йӧра дзизьӧбтіс сюрнас керка пельӧсӧ, сюрыд уси. Уси и Рака, но сюрсьыс оз лэччысь.

— На, — шуӧ Йӧра, — менсьым сюрӧс вузав да ньӧб зарни сапӧгтӧ. Ачыс вӧрӧ пышйис.

— Ой-ой-ой, — горзӧ Рака, — верӧсӧй менӧ эновтіс, сӧмын сюрсӧ и колис. Кыдзи сэсся овны кута?