КӦИН ОШЛЫ АБУ ЁРТ

Ӧтчыд корис Ош Кӧинӧс. Волы пӧ, Кӧин другӧй, ме ордӧ гӧститны. Кӧр яйӧн чӧсмӧда. Локтіс Кӧин, пырис, пуксис кӧр яй дінӧ да зіля кутіс сёйны, кытчӧдз эз пӧт. Чеччис да шуӧ:

— Сэсся ме ордӧ волы, мыйӧнкӧ тшӧтш гӧститӧда. — И муніс.

Кӧинлы кыйсьыны дыш. Сиктысь порсьпи гусяліс, ас ордас вайис да и мӧвпалӧ: «Ошкӧс кӧ кора, аслым оз коль». Джынсӧ и сёйис. Видзӧдӧ — Ош локтӧ. Порсь джынтӧ и дзебис бӧж улас.

Ош пырис, а Кӧин лапаяснас шенасьны кутіс:

— Ок, Ошкӧй другӧй, талун тэнӧ гӧститӧдны нинӧмӧн. Нинӧм абу, нинӧм абу.

— Но, — шуӧ Ош, — а бӧж улад нӧ мый?

Тшӧкмуніс Кӧиныд да кывсӧ курччис.

— Но, но, — ме тэнсьыд гусятортӧ ог и сёй, — янӧдіс Ош. — Верман бӧжтӧ вештыны.

Ош петіс Кӧин ордысь. Сэсянь ёртасьӧм на костын и быри.