БӦБЙӦДЛЫСЬ КАНЬ МАЛАНЬ

Паш Петь Ёгорлӧн вӧлі кань, Малань нима. Зэв дыш, сӧмын дасьсӧ сёйны радейтӧ.

— Но, — шуӧ Паш Петь Ёгор, — тайӧ дыш каньысь пӧльза абу. Нуа вӧрӧ, гашкӧ, сэні аслыс кынӧмпӧт корсяс.

Мешӧкӧ сюйис да нуис. Лэдзис вӧр шӧрӧ.

— Мун, но и гортӧ эн лок. Велӧдчы кынӧмпӧт корсьны.

Ветлӧдлӧ вӧрын кань Малань. Паныд пуксис Сюзь да юалӧ:

— Мый нӧ, кань Малань, вӧрас вӧчан?

— Да со кӧзяин шыръясла ыстіс. Весиг пӧ гортын ӧти шыр абу. Он-ӧ отсышт шыръяссӧ гортлань вӧтлыны? А ме тэнӧ чӧсмӧдла чипанпиянӧн.

— Отсышта, — шуӧ Сюзь. — Чипанпиянтӧ важӧн нин эг сёйлы.

Кутіс кань Малань нявзыны, Сюзь бордъясӧн шлапкыны. Шыръяс повзисны и мӧдӧдчисны грездлань. Паныд Руч.

— Мыйла нӧ шыръяссӧ табунӧн вӧтланныд? — юаліс сійӧ.

— Кӧзяин тшӧктіс. Гажтӧм пӧ натӧг. Отсышт, нӧкйӧн чӧсмӧдла.

— Отсышта.

Кутісны куимӧн вӧтлыны. Кань нявзӧ, Сюзь бордъясӧн шлапкӧ, Руч увгӧ. Войнас жӧ и воисны Паш Петь Ёгор керкаӧдз.

Ӧдйӧ и аддзисны шыръяс розьяс гӧбӧчӧ. Уськӧдчисны, ӧти здукӧн став запасъяссӧ Паш Петь Ёгорлысь няртісны, ротӧсалісны.

Кань Сюзьлы петкӧдліс курӧг позйысь чипанпиянӧс, а кӧзӧдысь Ручлы нӧк кринча. Сюзь лэбис, а кань Малань да Руч котӧртісны вӧрӧ.

Асывнас Паш Петь Ёгор чеччис, пырис гӧбӧчӧ да быдӧн шай-паймуніс: тырыс шыръяс тювкъялӧны. Став запаслы рӧзӧр. Пырис курӧг позйӧ, ӧти чипан абу кольӧма. Кӧзӧдын нӧк кринча тыртӧм.

— Аттӧ дивӧ! Кань Малань дырйи татшӧм дивӧыд эз вӧвлы.

Муніс вӧрӧ бӧр, кань Маланьӧс корны.

— Кысульӧй, Маланьӧй, лок гортӧ бӧр.

А кань Малань трӧпа вылӧ водӧма да нюжӧдчӧма.

— Ой, ой, тшыгъялӧмсьыс, буракӧ, нюжӧдчӧма...

Босьтіс моздорас да и вайис гортас.

— Ноко, кань Малань, кӧть повзьӧдышт шыръяссӧ.

Заводитіс кань Малань шыръяс кыйны да вӧтлавны. Кунас нин зывӧк лои сёйны да кульӧмӧн кутіс. А куяссӧ топ йылӧ зэлӧдны. А Паш Петь Ёгор ошкӧ, кань Маланьӧс малалӧ.

А кань Малань и шуӧ:

— Став шыръяссӧ нин кыйи. Вӧчны нинӧм лои. Муна вӧрӧ.

— Но мун, да менӧ эн жӧ вунӧд.

Вӧрын ӧти шыр кыйис, кусӧ кулис, топ йылӧ ӧшӧдіс, а пасьтӧм шырсӧ лэдзис. Локтіс Руч, юалӧ:

— Мый нӧ эськӧ вӧчан, кань Малань?

— Да вот шыръяссӧ тшӧктісны кульны да закупӧ сдайтны. Амбар тыр пӧ зӧр шыдӧсӧн налы сетасны. Позьӧ тӧвбыд шогтӧг овны ставыслы. А ӧні кӧсъя ассьым куӧс кульны да сдайтны. Куыд мичаджык на быдмас. А важ ку вылас сетасны калбас да тшыкӧдӧм чери. Ок и чӧсмасьышта.

— Сё дивӧ тай?! А менам ку вылӧ мый эськӧ сетасны?

— Ме чайта, тэнад куыд ме дорысь донаджык. Унджык на босьтан.

— Вай менсьым водзджык куль, — ышловзис Руч.

— Колӧкӧ, бара куля. Сӧмын ӧти здук ковмас увлань юрӧн ӧшалыштны. А выль пасьыд мичаджык на быдмас. Ӧні гожӧм, он кынмы.

— Збыль и эм, лёк жар.

Ӧти здукӧн Руч лои пасьтӧм. А сійӧ пу вылын, вӧлӧм, Тулан пукалӧ. Ставсӧ кылӧма и аддзӧма. Лэччис пу вылысь да тшӧтш тшӧктіс сылысь кусӧ кульны, туяс кӧ.

— Мыйла оз туй!

Синмӧн лапнитны эз удит, и Тулан увлань юрӧн ӧшалӧ. Кань Малань муртса серам кутны вермӧ. Босьтіс куяс мыш вылас да котӧрӧн Паш Петь Ёгор ордӧ.

Дыркодь нин Руч да Тулан ӧшалісны. Локтіс сэтчӧ Кӧин да ӧдва найӧс тӧдіс.

— Мыйла нӧ, Ручӧй, Туланӧй, ӧшаланныд пасьтӧм ракаяс моз? Кӧні тіян пасьясыд?

— Кань Маланьлы сетім закупӧ сдайтны. Регыд калбас да быдсяма чӧсмӧданторъяс ваяс. А куыд регыд выль быдмас.

— Ок и бӧбйӧдлӧма тіянӧс кань Маланьыд. Кодлӧн нӧ выль ку быдмылӧ? А тіянӧс быдӧн сӧмын серавны кутасны.

Найӧс разьӧм бӧрын шуис:

— Срам да и сӧмын. Пышйӧй овтӧм ді вылӧ. Медым некод эз аддзыв.

А Паш Петь Ёгорлӧн вӧлі ӧти пи, Макар нима. Жӧник нин лои, а некутшӧм сям абу. Весиг дӧрӧмсӧ лючки кизявны оз куж. Став нывъяс сы вылын сералӧны бать дырйиыс. Яндзим лои пи вӧснаыс Паш Петь Ёгорлы. Чукӧстіс Макарӧс дінас и шуӧ:

— Вот, пиӧй, жӧник нин, а нывъяс тэнӧ сералӧны. Буракӧ, сям ни путь. Аски мунан ылыс вӧр чомйӧ овны — чери, зверь кыйны. Сов да сукар дасьті нин, босьт ёрт пыдди кань Маланьӧс.

Аскинас водз асыв Макар кань Маланькӧд петісны кузь туйӧ. И сӧмын рытнас вӧр чомйӧ воисны. Макар босьтіс вӧр чомйысь капканъяс да пукталіс матігӧгӧрӧ. Сэсся босьтіс чомйысь кӧвтым да матысса тыӧ чери кыйны муніс. Ӧти кӧвтым помсӧ пу бердӧ кӧрталіс, мӧд помсӧ пельпом вылас сюйис. Сӧмын ваӧ пырис, джумйӧ пыр и вильдіс. Ӧдва и кавшасис берегас.

— Но, — шуӧ, — чери кыйӧм эз артмы, муна капканъяс видлавны.

А кань Малань кок бердас ниртчӧ, сёйны корӧ.

— Чӧвлы, гашкӧ, кутшӧмкӧ яй шедіс, верда.

Видлалӧ быд капкан, нинӧм абу. Ачыс тшыг и кань Малань вердтӧм.

— Но и кӧзяин, — шуӧ кань Малань, — дзик нин нинӧм тэысь. Ветла ме, капканъяссӧ лӧсьӧда.

Муніс, быд капкан дінӧ бӧжсӧ лэптӧмӧн ассьыс дук зильгӧдышталіс. Сэсся бӧр чомъяс локтіс.

Асывнас Макар бара капканъяс видлавны муніс. А кань Малань чери кыйны. Кер пом вылӧ пуксис, чериӧс аддзас, гыжсӧ паськӧдас, дзумнитас лапасӧ ваӧ, и чери самалас. Берегӧ шыбитас да бара.

Макар видзӧдӧ да, быд капканын мыйкӧ эм. Шедісны кык кӧч, руч да вурдысь.

— Вот, — радлӧ Макар, — абу тай ме дзик сямтӧм. Шедісны тай талун. Муна, кӧч яя шыд пуа.

Кань Малань черитӧ пӧттӧдз нин сёйӧма. Макарлы вель уна на вайис дай. Сэсся Макарлы зверь куяс отсаліс кульны. А сійӧ кадӧ, вӧлӧм, Царевна ӧмидз вотігӧн вӧрӧ вошӧма. Мунӧма, мунӧма и вӧр чомйӧ воӧма. Пырис вӧр чомйӧ. Макарлӧн кывйыс кынмӧма. Вом восьтіс. Нинӧм шуны оз вермы. Царевна шуӧ:

— Молодеч, дзик тшыгла куті кувны, куим лун нин нинӧм эг сёйлы. Вӧрӧ воши.

Ӧти здукӧн пызан вылын лоисны яя шыд, жаритӧм чери да сукар стопа. Пуксис Царевна, сёйис, юис, сэсся юаліс Макарлысь ним да кодкӧд олӧ. Кань Маланькӧд пӧ.

— Он-ӧ тэ, Макар, юӧрт Царлы, мый ме тані?

— Ме кӧть эськӧ юӧрта, да тэнӧ ӧтнадтӧ ог лысьт кольны. Сё кӧин, гашкӧ, гӧгӧр ветлӧдлӧ. А вот менам кань Малань зэв ӧдйӧ котӧртлас. Сӧмын сет кутшӧмкӧ знак.

Царевна кань Маланьлы лапаас сюйис чунькытш.

Воис котӧрӧн рытнас дворечӧ, некутшӧм стража сійӧс эз кут. Веськыда Царь ордӧ. Аддзӧ Царь — кань палатаӧ пырис, лапа мыччӧ, а лапаас чунькытш.

— Кысь тэд тайӧ чунькытшыс? — юаліс кань Маланьлысь.

— Тіян нылыд, Царевнаыд, ыстіс, медым ті сетанныд сӧглас и благословение менам кӧзяин сайӧ верӧс сайӧ. Он кӧ сетӧй, некор тіянлы нывтӧ не аддзывлыны.

— А коді тіян кӧзяинныд? — юаліс Царь.

— Медъён багатырыс, сы водзын став зверьясыс копрасьӧны да ассьыныс куяссӧ асьныс и кульӧны, сылы сетӧны. А черияс асьныс жӧ берегӧ кавшасьӧны.

— Татшӧм багатыр сайӧ позьӧ и Царевнаӧс сетны, — думыштіс Царь и сетіс сӧглас.

Кань Маланьлы прикажитіс сетны нёль гоз вӧла-доддя. Мун пӧ и вайӧд нылӧс да зятьӧс. Ворсам свадьба. Приданнӧйӧс царство джын сета.

А сы кості Макарлы Царевнаыд ёна и кажитчис. Царевналы Макарыд сідзжӧ сьӧлӧм вылас ликмис.

Воис кань Малань нёль гоз вӧлӧн.

— Сідз пӧ и сідз, — шуӧ кань Малань, — батьыд сӧглас сетіс: коді пӧ спаситіс нылӧс, сійӧ и жӧник.

Воисны дворечӧ, свадьба вылӧ бать-мамсӧ корисны и став нывъяссӧ деревнясьыс. Ёна и завидьтісны Макарлы.

А кань Малань сваття пыдди пукалӧ. Быдӧн сійӧс малалӧны да ошкӧны.