РУДУК

Ӧти бур аньлӧн вӧлі ичӧтик нывка Машук. Удж вылӧ бур аньлы колӧ мунны, а Машукӧс некодкӧд кольны. Ӧтчыд мунӧ рыныш дорті, а сэні руд кань идзас кольта вылын пукалӧ. Синъяссӧ лапанас малалӧ. Бур ань юаліс:

— Рудук, Рудук, он-ӧ пестуйтышт менсьым Машукӧс?

— Бур-мур-р, — мурзыштіс Рудук.

Босьтіс бур ань Рудукӧс моздорас да и гортас вайис. Рудук Машук кок дорын ниртчӧ да мойдъяс мургӧ:

— Руй, руй, кытчӧ ветлін?

— Паськыд вӧрӧ ветлі.

— Руй, руй, мый сэсь корсин?

— Пӧрысь пожӧм корси.

— Мыйла пожӧмыс колӧ?

— Пожӧм сёрнитны кужӧ.

— Мый пожӧмыс висьталіс?

— Кодыр гожӧмыс локтас.

— Кор нӧ гожӧмыс локтас?

— Кор пӧ шонді кыпӧдчас.

— Кӧн нӧ шондіыс куйлӧ?

— Паськыд саридз сайын пӧ.

— Шонді сэтысь кыпӧдчас,

Ставлы шоныдсӧ сетас.

Сідз и унмовсис Машук. И Рудук дінас узьӧ. Эз и кывлыны, кыдзи мамыс удж вылысь локтас.

Ӧти тувсовъя асылӧ Машук ывлаӧ петіс. Рудук орччӧн мунӧ. Машук маті вӧрӧ пырис. Рудук оз кольччы. Паныд налы Ош локтӧ. Кватитіс сійӧ Машукӧс моздорас, да зэв ӧдйӧ аслас чомйӧ нуис. Рудук сы бӧрся вӧтчис да лабич улӧ дзебсис. Ош эз и казяв.

Пуксьӧдіс Ош Машукӧс лабич вылӧ да шуӧ:

— Кутан ме ордын овны, менсьым гӧнӧс шыльӧдны.

Лои Машуклы Ошлысь гӧн шыльӧдны аслас сынанӧн. Рудук лабич улын руйгӧ-мойдӧ.

— Руй, руй, мый нӧ вӧчан?

— Ошлысь гӧн шыльӧда.

— Мыйла гӧнсӧ шыльӧдан?

— Медым синъяссӧ куняс.

— Мыйла синъяссӧ куняс?

— Медым Ошкыс унмовсяс,

Медым вӧтасьны кутас,

Сэк и Машукыс пышъяс.

Ошкыд унмовсис. Машук Рудуккӧд пышйисны. Котӧртісны, котӧртісны, лёк раскӧ воисны. Паныд Руч.

— Машук, Машук, мунам ме ордӧ, самӧвар чайӧн юктӧда.

Пырис Машук Руч чомйӧ, а Рудук лабич улӧ тювкнитіс.

Пуксис Машук пызан сайӧ, а Руч и шуӧ:

— Чӧвлы, сакарӧй вунӧма, петала чуланӧ.

Петіс да ортсысяньыс ӧдзӧссӧ зорйӧн пыкис.

— Ӧні менам чомйысь некытчӧ он пышйы, — горӧдіс, — кутан ручпиянӧс видзны!

А ручпияныс зэв вильышӧсь да курччасьысьӧсь. Пач сайын ӧта-мӧдсӧ пурӧны-курччалӧны. Чукӧртіс Машук ручпиянӧс, потанӧ водтӧдаліс да лайкйӧдлыны кутіс, а Рудук бара руйгӧ-мойдӧ:

— Руй, руй, мый вӧчан?

— Ручпиянӧс пестуйта.

Потанын лайкйӧдла,

Медым ставныс узьӧны.

Вильшасьныыс мудзисны,

Курччасьныыс дӧзмисны.

Руч мам вӧрын кыйсьӧ,

Пияныслы шыр ваяс.

Ручпиян унмовсисны. Петіс ӧшинь пыр Рудук, ӧдзӧс пыкӧд вештіс, Машукӧс лэдзис. Котӧртісны гортаныс. Мамыс паныд.

— Кӧн нӧ ветлӧдланныд? Ме нин йӧла рок пуи. Локтӧ сёйӧй.

Ставӧн сёйисны: зэв чӧскыд вӧлі рокыс.