ВИЛЬЫШ ӦЛЬӦШ

Олісны-вылісны пӧль да пӧчӧ. И зэв ёна шогсисны: челядь ни внукъясыс налӧн эз вӧвны.

Ӧтчыд пӧрысь пӧчӧ капуста вӧлі шырӧ. Босьтіс медыджыд кӧчансӧ, коръяссӧ весавны кутіс, а сэсь ичӧтик детинка сюри. Ок и любӧ лои пӧчӧ-пӧльлы.

— Со и внук миянлы сюри! Кыдзи нӧ тэнӧ шуӧны?

— Вильыш Ӧльӧш, — вочавидзис детинка.

— Но, Вильыш Ӧльӧш, пуксьы, рок сёй.

И Вильыш Ӧльӧш пуксис веськыда рок пиӧ.

— Тэ мыйла рок пиас пуксин? — шензьӧны пӧч-пӧль.

— Тадз чӧскыдджык.

— Мунам град гӧрны, капуста рӧсада пуктам, — шуисны пӧрысьяс. А Вильыш Ӧльӧш босьтіс суниса ем да кутіс град гӧрны, а капуста рӧсада куранӧн куртны.

— Тэ мыйла градсӧ гӧран? Тэ мыйла рӧсадасӧ куртан? — шензьӧны пӧрысьяс.

— Медым гырысьджыка быдмас.

И збыль, быдмисны сы гырся капуста мачьяс, мый ӧткӧн нуны он вермы.

— Ветла, вӧла-доддя вайӧда, — шуӧ пӧль.

— Оз ков, — шуӧ Вильыш Ӧльӧш, — ме мач вылӧ пукся, ачыс быгыльтчас горулӧ.

И быгыльтчис. Капуста коръяс сюв-сяв гылалісны, а Вильыш Ӧльӧшлӧн юр пыддиыс капуста мач.

Оз ков вильшасьны, юртӧ ассьыд воштан, капуста мачӧн лоан.