ТАР ПАСТУК

Оліс-выліс Кӧк кӧкпияныскӧд. Кӧк вӧрӧ рокла лэбӧ, а кӧкпиян позйын ӧтнаныс кольӧны. Кӧк шогсьӧ: «Коли пиянӧс ӧтнаныссӧ, кӧть мед найӧс Сюзь оз гусяв. Колӧ пастукӧс корсьны».

Ӧти луд вылын пӧкаживайтӧ томиник Тар.

— Тар, Тар, лок ме ордӧ кӧкпиянӧс видзны-пастушитны. Рокӧн вердны кута.

— Роктӧ радейта-та-та. Локта-та.

Локтіс. Кӧкпиянӧс нуӧдіс луд вылӧ. Шань гӧлӧсӧн, меліа тоткӧ-шуалӧ:

— Ті, кӧкукъяс, гӧна тупыльяс, энӧ разӧдчӧй, энӧ торйӧдчӧй. Вадорӧ энӧ лэччӧй. Сэні Руч шӧйтӧ, тіянӧс куталас-гусялас.

А кӧкукъяс разалісны-торъялісны. Ӧти куст улӧ, мӧд вутш улӧ, коймӧд кор улӧ, а нёльӧд кытчӧкӧ. Быдласянь горзӧны:

— Ку-ку, — ӧтарын,

Ку-ку, — мӧдарын,

Ку-ку, — сэні,

Ку-ку, — кӧнкӧ.

Тар котралӧ ӧтарӧ-мӧдарӧ. Ӧти сюри, мӧд локтіс, сэсся коймӧдыс, нёльӧдыс дыр эз сюр. Водзӧ Тар жбыркнитіс коз йылӧ.

— Та-та-та! — горӧдіс. Бордйӧн швач-швач. Кӧкуньяс повзисны, вадорӧ пышйисны. А сэні Руч налы и шуӧ зэв мудера:

— Ті, кӧкъяс, гӧна тупыльяс, пуксьӧй менам пыжӧ. Ме тіянӧс мӧдлапӧлӧ вуджӧда.

Кӧкъяс пуксисны Руч пыжӧ. Руч найӧс кылӧдӧ-ылӧдӧ. Сэк сӧмын Тар и аддзис. Ыджыд гӧлӧсӧн горӧдіс:

— Кӧкӧй! Кӧкӧй!

Руч пиянтӧ гусяліс,

Пыжӧ пуксьӧдіс,

Кывтӧ-катӧ,

Мӧдлапӧлӧ вуджӧдӧ.

Кӧк кыліс, лэбис. Ручлы грӧза горӧдіс:

— Тэ, Руч, мыйла кӧкукъясӧс гусялін? Синтӧ-пельтӧ кокала. Пыжтӧ розьӧда. Вӧян. Вай менсьым пиянӧс.

Руч повзис и пышйис. А Кӧк бӧр берегӧ пыж вуджӧдіс, позъяс вайӧдіс. Рокӧн пиянсӧ вердіс. Тарлы эз сет. Видчӧ-пинясьӧ:

— Тэ, Тар, тур-тар пастук! Мыйла коз пу вылӧ лэбин? Мыйла та-та горзін? Мӧдысь сідзтӧ эн нин вӧч. Мӧдысь бура дӧзьӧрит.

Мӧдысь Тар пастук нуӧдіс луд вылӧ кӧкукъясӧс. Да зэв меліа таткӧ:

— Ті, кӧкукъяс, гӧна тупыльяс,

Энӧ разӧдчӧй, энӧ торйӧдчӧй.

Лёльӧ-бобӧ кокалӧй,

Лысва юӧй.

А кӧкукъяс вадорӧ пышйисны. А сэні Руч пӧкаживайтӧ. Кӧкукъясӧс пӧрйӧдлӧ. А Тар кыліс да горӧдіс:

— Ак-ак-ак! Тэ, Руч, гӧрд мыш, кузь бӧж! Мыйла кӧкукъясӧс пӧрйӧдлан? Мыйла гусясян?

— Кӧк-мам вылын пукалӧ!

Кӧк-мам ылысянь аддзӧ.

Тэнсьыд син-пельтӧ кокалас.

Руч повзис и пышйис. А Тар вайӧдіс кӧкукъясӧс позъяс. Воис Кӧк мам, рок вайис. Ставнысӧ вердіс. Тарлы кык мында сетіс.