ЧЕРИ КЫЙЫСЬ КАНЬ

Ворсӧны: Кань, Руч.

Колӧ роч пач, лӧсьӧдны тыв.

Кань ю дорын тывъялӧ.

КАНЬ. Ой, ой! Буракӧ, чериыс уна шедіс. Ог вермы кыскыны тывсӧ. Коді матын, отсыштӧй!

Локтӧ Руч.

РУЧ. Мый нӧ, Каньӧй, горзан?

КАНЬ. Отсышт тыв кыскыны, уна чери тывйӧ пырӧма, ог вермы ӧтнам, джынсӧ тэд сета.

Руч тывйӧ кутчысис, вильдіс да бызмуніс ваӧ.

РУЧ. Тэ вӧсна тӧкӧтьӧ эг вӧй. Став кучикӧй кӧтасис. Тірала. Кынма. Косьты менӧ, кыдз кӧсъян.

КАНЬ. Эн шогсьы. Мунам ме ордӧ. Ми Петуккӧд кыкӧн олам. Сійӧ менам помощнича, тыв кыӧ, а ме чери кыя. Миян роч пач эм. Паччӧр вылас шонтысян и косьман.

Руч кайис паччӧр вылӧ.

РУЧ. Медым Петукыд менсьым гӧн шыльӧдыштас, ставыс со гынмис.

Петук кайис паччӧр вылӧ. Руч кватитіс Петукӧс, тракӧдӧ, курччасьӧ.

ПЕТУК. Ой-ой-ой! Канюкӧй, Руч менӧ матӧ воштіс! Мезды!

КАНЬ. Ноко, мыйла менсьым помощничасӧ чиршӧдан?! Тэ вӧсна тыв вӧйті, уна чери лэдзи. Паччӧрӧ косьтысьны лэдзи, а тэ мый вӧчан?! Мун татысь!

РУЧ. Некытчӧ ог мун. Паччӧрсӧ меным сетін. Ме и кута тані овны.

КАНЬ. А ми кӧні кутам овны да шонтысьны?

РУЧ. Ті пач ломтӧй, пач улын олӧй. Таковскӧй!

Кань да Петук юрсӧ ӧшӧдісны.

КАНЬ (Петуклы). Тэ, Петукӧй, тыв кы, а ме чери кыйны ветла. (Муніс).

РУЧ. Лок, колӧкӧ, Петук, ме ордӧ, шонтысь, мойдышта.

ПЕТУК. Ме ог эшты. Ачыд лок ме дінӧ да мойд.

Руч лэччис паччӧр вылысь, пуксис Петук дінӧ. Петук шыбитіс руч вылӧ тыв.

ПЕТУК. Вот ме тывъяла тэнӧ, базар вылын вузала!

Локтӧ Кань, кыскӧ зэв ыджыд чери.

КАНЬ. Со, Петукӧй, мый ыджда чери кыйи, тэа-меа чӧсмасьыштам.

ПЕТУК. Видзӧд, Ручтӧ ме тывйӧн кыйи. Мый кутам вӧчны?

КАНЬ. Кыскам ылӧ вӧрӧ да лэдзам. Мед сэсся миянӧ некор оз лок.

РУЧ. А ме черитӧ тшӧтш кӧсъя сёйыштны. (Бӧрдӧ).

КАНЬ. Ми бур зверъястӧ век гӧститӧдлам, а тэ, лёк Руч, мун татысь. (Вӧтлӧ).