СЯМТӦМ ОШ

Ворсысьяс: Ош, Кань, Петук, Руч, Кӧза.

Ош куйлӧ, локтӧ Петук, йиркӧдчӧ.

ПЕТУК. Гортын абу, Ош Миш?

ОШ. Гортын пыр.

ПЕТУК. Лок, чери кыйны ветлам. Со менам кык шатин. Ӧтисӧ тэд сета.

ОШ. Ог куж черисӧ кыйны. Тэ меным вылӧ тшӧтш кый. Кык-куим кӧ и сійӧ бур.

Петук мунӧ, локтӧ Кань.

КАНЬ. Ош Миш, лок шыръяс кыйны ветлам. Таво зэв уна рӧдмӧмаӧсь. Сӧмын кватлав.

ОШ. Мыйкӧ талун дыш. Тэ меным кыйышт гоз-мӧдӧс.

Кань муніс. Локтӧ Руч.

РУЧ (гусьӧн). Ош Миш, ветлам чипан гусявны, сиктын быд йӧрын зэв уна.

ОШ. Ог лысьт, нӧйтасны либӧ понъяс пурасны. Ӧти чипан меным вылӧ гусяв.

РУЧ. Ладнӧ, Ош Миш. Тэ эн шогсьы, вод, синтӧ кунь. Вомтӧ паськӧд. А ме чипантӧ гусяла да вомад и брутнита, сӧмын ньылышт.

Ош водӧ. Локтӧ Кӧза.

КӦЗА. Со, Ошкыс, буракӧ, кулӧма. Ноко, видлам, кулӧма абу. (Кӧза матыстчӧ сы дінӧ, люкыштӧ. Ош куйлӧ, оз вӧрзьы. Кӧза люкыштӧ мый вынсьыс веськыда вомас да сюръясыс и сибдісны ошлы вомас).

КӦЗА. Ой, сибді! Мездӧй!

Локтӧны Петук, Кань да Руч.

РУЧ. Видзӧдӧй, Ош Миш вӧлӧм кужӧ кыйсьыныд, сӧмын горшысла да дышысла радейтӧ дасьсӧ сёйны. Сӧмын йӧйыд вывті горшысла сюрсяньыс заводитӧма кыйсьыны. Мездамӧй вайӧ!

Ставӧн нетшкӧны Кӧзаӧс.

ОШ (ныр пырыс). Ой, пинь анӧй ори Кӧза сюр бердас. Кыдзи нӧ кута сёйны?

КАНЬ, ПЕТУК, РУЧ. Сідз тэд, дыш Ош, и колӧ. Он кут мукӧд вылӧ надейтчыны. Дасьсӧ виччысьны.