ПЕТУК ДА КӦК ВОК

Олісны-вылісны Петук да Кӧк вок. Ӧтчыд Кӧк вок шуӧ:

— Муна вӧрӧ тӧв кежлӧ пес дасьтыны. А тэ, Петукӧй, гортын ов. Ӧшинь, ӧдзӧс каличав. Некытчӧ эн пет.

— Ко-ко-рошо, — шуӧ Петук.

Муртса Кӧк вок лэбис вӧрӧ, пырысь-пыр и Руч локтіс. Ӧшиньӧ таркӧдчӧ. Мича гӧлӧсӧн сьылӧ:

— Петук, Петук,

Зарни партук,

Гӧрд сорса-тошка,

Ыргӧн эзысь бордъя,

Ӧшиньтӧ восьтышт,

Пирӧг-шаньга босьтышт.

Петук ӧшинь восьтыштіс. Руч Петукӧс юрӧдыс тшапнитіс, ӧшиньысь кыскис, киняулас шамыртіс, пыжӧ пуксис. Сынӧ, кывтӧ-катӧ. Петук горзӧ-бӧрдӧ:

— Кӧкӧй-вокӧй, Кӧкӧй-вокӧй!

Руч менӧ кватитіс,

Киняулас шамыртіс,

Пыжӧн кывтӧ-катӧ,

Зарни бордйӧс нетшкӧ,

Гӧрд сорсъясӧс курччалӧ!

Кӧк вок кыліс, лэбис, Ручӧс вӧтӧдіс, пельяссӧ чепляліс, муртса синъяссӧ эз кокав, Петукӧс мырддис. Гортас моздорас нуис. Вольпасьӧ водтӧдіс. Ачыс бара вӧрӧ мӧдӧдчис и шуӧ:

— Эн нин гортсьыд пет. Каличась-игнась. Ручыдлысь эн кывзы.

Лэбис Кӧк вок, а Петук горт овны кольччис. Ӧшинь дорас пукалӧ. «Кикуруллю» сьылӧ.

А Руч бара нин сэні. Ӧдзӧс каличӧ таркӧдчӧ, сьылӧ:

— Петук, Петук,

Зарни партук,

Гӧрд сорса-тошка,

Ыргӧн-эзысь бордъя,

Ӧшиньтӧ восьтышт,

Пирӧг-шаньга босьтышт.

— Ог, ог, ог, — шуӧ Петук.

А Руч бара сьылӧ:

— Петук, Петук,

Зарни партук,

Гӧрд сорса-тошка,

Ыргӧн-эзысь бордъя,

Тані чипанъяс ворсӧны,

Пирӧг-шаньга пудъялӧны.

Ӧти чипанлы лои,

Петуклы оз сет.

— Ко-ко-коді оз сет?! — горӧдіс Петук. Ӧшинь восьтіс. Руч сійӧс тшапкис-босьтіс. Киняулас шамыртіс. Петук бара бӧрдӧ:

— Кӧкӧй-вокӧй! Кӧкӧй-вокӧй!

Руч менӧ кватитіс!

Киняулас шамыртіс!

Пыжӧн кывтӧ-катӧ,

Дзикӧдз вои матӧ!

Кӧкыд кыліс. Ручӧс лэбис-вӧтӧдіс. Петукӧс мырддис. Гортас вайис, тшайӧн юктӧдіс, вольпасьӧ водтӧдіс. Петук бӧрдӧ.