ВЕЛӦДЧЫ КРЫСА КЫЙНЫ

Олісны-вылісны Сӧлӧ баб Малань канькӧд. Малань кань ниртчӧ Сӧлӧ баб кок улын, мургӧ.

— Вай чери, вай яй!

— Кысь нӧ чериыс да яйыс! Ачым нин вель дыр эг сёйлы. Рок сета да он сёй-а. Мун ачыд яйсӧ кый.

Скӧрмис Малань кань, кытчӧкӧ ветліс да вайис неыджыд шырӧс. Кок улас Сӧлӧ баблы пуктіс да шуӧ:

— На, сёй, тэд вайи.

— Тэ кӧ кыйин, тэ и сёй. Ог кӧсйы тэнӧ удзӧдны. Молодеч Маланья. Пыралан кӧ эськӧ мӧс гидӧ да сэсь крысасӧ кыян.

— Ме сэтчӧ ог пыр! — шуӧ Малань кань. — Мадӧ мӧсныд ышнясьӧ, ме вылӧ мӧс ловнас пӧльтӧ. Сюрнас гогйӧдлӧ, дась йӧвсӧ пӧ менсьым лакан.

— Но сё дивӧ! — шензьӧ Сӧлӧ баб. — Лоӧ нальк пуктыны. Гашкӧ, сэтчӧ шедӧ крысаыс.

Пуктіс нальк да мӧд асывнас и шедӧма неыджыд крыса. Нальк сутугасӧ йирӧ. Ачыс Сӧлӧ баб крысасӧ лэдзны оз лысьт. Корис Маланьӧс:

— Маланья, ме нальк восьта, а тэ крысасӧ кый.

— Бур-р, отсышта, мый тэкӧд вӧчан.

Восьтіс Сӧлӧ баб нальк, крыса петіс. Маланья кватитіс крысасӧ шошаӧдыс да нуис. Кытчӧ чайтанныд? Гортас, веськыда горничаас да лэдзис ловъянас, а сійӧ — диван улӧ...

— Сё мокасьт! — горӧдіс Сӧлӧ баб, — мыйла нӧ крысасӧ ловйӧн лэдзин?

— Медым тэ велӧдчан кыйсьыны, век нин яй, — мурӧстіс Малань кань.

Босьтіс Сӧлӧ баб коколюка да кутіс грымӧдны диван улын, крыса пышйис гардероб улӧ. А Малань кань горзӧ:

— Курччы пиньнад. Кватит ӧдйӧ гыжнад!

— Ог лысьт! — горзӧ Сӧлӧ баб. — Менӧ ачымӧс курччас!

Бара лои Сӧлӧ баблы грымӧдны коколюкаӧн гардероб улын. Крыса пышйис пач сайӧ:

— Но и но! Сӧлӧ баб! Тадзтӧ некор он велав крыса кыйны! Колӧ ӧд ӧти здукӧн уськӧдчыны. Медым киыд чардби кодь, а синмыд — ӧгыр кодь! — бара горзӧ Малань.

Сӧлӧ баб пач сайын грымӧдӧ коколюкаӧн. Крыса петіс да гын сапӧгӧ пырис. Сӧлӧ баб чеччыштіс да тальыштіс гын сапӧгсӧ. Крысаыд чирӧстіс да ланьтіс. Сӧлӧ баб сэсся крысатӧ пыркнитіс да чужйис сійӧс Маланьлы. А сійӧ шуӧ:

— Молодеч, Сӧлӧ баб, велалін крыса кыйны! Шедіс кӧ, ачыд и сёй. Ме тэнӧ ог кӧсйы удзӧдны.