АВТОБУС

Сулалӧ автобус туй бокын и бӧрдӧ. Мунӧ велосипед.

— Мый нӧ, автобус, бӧрдан? — юаліс.

— Кӧлесаӧй жугалі-а-а! У-у-у!

— Эн бӧрд, — шуӧ велосипед, — босьт менсьым ӧтисӧ.

— А тэ кыдзи нӧ ӧти кӧлесанас кутан овны? — чуймис автобус.

— Ме муна уджавны циркӧ. Сэні ӧти кӧлесанас пелькджык лоан.

Сетіс велосипед автобуслы ӧти кӧлесасӧ и муніс циркӧ.

— Аттьӧ, бур велосипед, — шуис автобус да пуктіс аслыс велосипед кӧлеса. Тӧкӧтьӧ муныштіс, велосипед кӧлесаыд кусыньтчис. Ӧгуреч кодь лоис.

— У-у-у! — бара бӧрдӧ автобус.

— Тр-тр-тр, — мунӧ трактор. — Мый нӧ бӧрдан, автобус ёртӧй?

— Кыдзи нӧ ог бӧрд. Аслам кӧлесаӧй жугаліс. Велосипед сетіс ассьыс, и сійӧ кусыньтчис. Кыдзи нӧ кута ветлӧдлыны? У-у-у!

— Тэныд велосипед кӧлеса оз туй. Пуксьы менам мыш вылӧ, нуа тэнӧ гаражӧ, а сэн пуктасны тэныд туяна кӧлеса.

Сідз и вӧчис автобус.