КУИМ КОКА ОШ

Ӧтчыд пӧль муніс вӧрӧ, капканъяс лӧсьӧдаліс кӧч вылӧ. А мӧд луннас видлаліс да шай-паймуніс: ӧти капканын ош лапа. Капканыд зялькнитӧма-топӧдӧма. Лапаыс и чегӧма. Ошкыд ачыс куим кокӧн пышйӧма. Вайис пӧль ош лапасӧ гортас, сетіс пӧчлы. Сійӧ кусӧ кулис, гӧнсӧ шырис да печканӧ кӧрталіс, а лысьыс пачын шыд пуис. Сэсся пуксис печкан вылӧ. Пемыд войӧдз печкис. И кылӧны: грездын куим кока Ош лётӧдӧ. Равзӧ:

— Став грездыс узьӧ,

Ӧти ӧшинь биа,

Пӧчӧ менсьым гӧн печкӧ,

Ку вылын пукалӧ,

Пачын лапа пуӧ,

Вай менсьым лапа!

Вай менсьым лапа!

Вай менсьым лапа!

Повзисны пӧль-пӧчӧ. Пӧлатьӧ кайисны. Ош кильчӧ восьтіс. Равзӧ:

— Вай менсьым лапа!

Вай менсьым лапа!

Ӧдзӧс восьтіс, равзӧ, пӧлать сюръя тракйӧ:

— Вай менсьым лапа!

Вай менсьым лапа!

Пӧлать сюръя пӧри, пӧлатьыд гыммуніс веськыда Ош вылӧ. Ошкыд лямаліс. Пӧчӧ-пӧльӧ Ош вылӧ усины, да серам босьтіс, яйыд ачыс локтіс. Дыр кежлӧ и тырмис.