КЫРСЬ ПЫЖ

Кӧдзыд тӧв помасис, тулыс воис. Лым сыліс. Ытва став пемӧсъяслысь оланін вӧйтіс. Варччӧны быдсяма пемӧсъяс — кылалӧны, бӧрдӧны. Ӧти Шыр кырсь вылӧ кавшасис, бӧрдӧ:

— Кырсьӧй, кырсьӧй,

Кытчӧ нӧ кылӧдан?

Ытвасӧ вуджӧд.

Берегӧ лясӧд.

Варччӧ Ур, Шырӧс аддзис, вӧзйысьӧ:

— Шырӧй, шырӧй,

Пуксьӧд кырсь пыжад.

Гӧнӧй кӧтасис,

Эбӧсӧй бырис.

— Пуксьы, тӧран кӧ.

Кылалӧны кыкӧн, бӧрдӧны:

— Кырсьӧй, кырсьӧй,

Кытчӧ кылӧдан?

Ытвасӧ вуджӧд,

Берегӧ лясӧд.

Варччӧ Кӧч, вӧзйысьӧ:

— Шырӧй, шырӧй,

Урӧй, урӧй,

Пуксьӧдӧй кырсь пыжад.

Ог нин вермы варччыны,

Тӧкӧтьӧ нин ог вӧй.

Кавшасис Кӧч кырсь пыжӧ, кырсь пыж путкыльтчис, ставӧн ваӧ усисны. Бӧрдӧны. Кыськӧ-мыйкӧ Йӧра варччӧ:

— Мый нӧ бӧрданныд, дзоля пемӧсъяс. Пуксьӧй менам паськыд сюр вылӧ. Вуджӧда тіянӧс берегӧдз.

Кавшасисны ставӧн Йӧра сюр вылӧ. Йӧра берегӧдз вуджӧдіс, пыркнитіс ставнысӧ руз-раз сюр вылысь. Берег вылын ставӧн тірӧбтісны, гӧнысь ва резыштісны. Тіралісны, тіралісны да косьмисны. Аттьӧ шуисны Йӧралы. Не сійӧ кӧ, колӧкӧ, ставӧн вӧйисны.