АТТЬӦ НИДЗУВЛЫ ДА ЛЯГУШАЛЫ

Быдмӧ град вылын капуста мач да ружтӧ-ойзӧ. Турунвиж лёльӧ сійӧс курччалӧ-розьӧдлӧ. Уйӧ му вывті Нидзув, аддзис сійӧс Лягуша да шуӧ:

— Нидзув, нидзув, ме тэнӧ ньылышта.

— Эн менӧ ньылышт, бурджык лоӧ, тэ кӧ капуста мач вывсьыс турунвиж лёльӧсӧ ньылыштан.

Кывзіс Лягуша да чавкнитіс-ньылыштіс турунвиж лёльӧсӧ, аттьӧаліс Нидзулӧс, мый индіс чӧсмасянторсӧ.

А Нидзув пырис му пиӧ, кутіс капуста вуж легӧдны да мусӧ вуж гӧгӧрыс розьӧдлыны. Капуста мач и шуӧ:

— Ыджыд аттьӧ тэныд, Нидзув, мый легӧдан менсьым вужсӧ, мусӧ небзьӧдан. Бурджыка куті мусьыс вынсӧ кыскыны. Мачӧй ӧдйӧ быдмӧ.