НЕРСЬЫСЬ БАЛЯ

Оліс-выліс Баля. Сійӧ зэв ёна радейтіс нерсьыны. Кодӧс аддзас, сійӧс и нерӧ. Кӧчильӧс нерис:

— Бе-е-е, кӧчильӧй,

Абу прӧсуж, абу йӧй!

Кык кокыд дженьыд,

Бӧръя кокыд вель кузь,

Чирк моз чеччалан,

Котӧртныд он куж,

Бӧжыд быттьӧ понпуш!

Кӧчильӧй сӧмын ӧдйӧджык кытчӧкӧ пышйис. Аддзис Баля Ручӧс. Бара сійӧс нерис:

— Б-е-е, ручӧй, ручӧй,

Кузь бӧжа пучӧй,

Кычи моз тявзан,

Сюзь моз чирзан,

Быдӧнысь полан,

Кыдзи бара олан?

— Эн нерсьы, — шуис Руч, — ас вылад видзӧдлы. Бӧжтӧ тай кодкӧ курччӧма-а. Медым пельтӧ оз орӧдны-а.

Локтіс сэтчӧ Кӧин, гӧп шӧрысь васӧ юӧ, а Баля сувтіс паныд, да бара сійӧс нерӧ.

— Бе-е-е, кӧин, кӧин,

Кытчӧ бара вӧйин.

Кынӧм улад бӧжыд,

Чурвидзӧ пельыд!

Кватитіс Кӧин Баляӧс пельӧдыс.

— Мыйла нерсян! — горӧдіс да курччис пельсӧ. — Вот тэныд, мӧдысь он кут нерсьыны! — лэдзис Баляӧс да нӧшта бӧж улас швачкис. А Баля горӧдіс, пожӧм гӧгӧр гӧгӧртіс да бара нерсьӧ:

— Бе-е-е, кӧин, кӧин,

Кутшӧм мустӧм лоин,

Бӧжыд лысӧма,

Гӧныд гынмӧма,

Сьӧд нырыд зырымӧсь,

Бӧж улыд лякӧсь!

— Аттӧ, бара нерсян! — горӧдіс лёкысь Кӧин. Кутіс Баляӧс да мӧд пельсӧ курччис. Баля гӧгӧртіс пожӧм гӧгӧр да бара нерсьӧ:

— Бе-е-е, кӧин, кӧин,

Куш бӧжа лоин,

Нырыд сісьмӧма,

Бӧр кокыд усьӧма,

Водз кокыд чегӧма.

Чуті-леті, лют-лёт,

Лёкыд тыри — эн пот!

— А-а, бара нерсян! — кватитіс Кӧин Балятӧ да дзоньнас ньылыштіс.

Путкылясьӧ Баля Кӧин рушку пиын да бара нерсьӧ:

— Бе-е-е, кӧин, кӧин,

Кынӧмад ме лои.

Рушкутӧ люкала,

Мустӧ поткӧда,

Сювтӧ розьӧда,

Став пытшкӧстӧ пузовта.

— Тьпу, матӧ воштіс тайӧ Баляыс. Кытчӧ и воштысьны? Лоӧ тайӧ трасичатӧ сьӧлыштны, — кызӧктас Кӧиныд — Баляыд рушкусьыд чеччыштіс. А Кӧин кытчӧкӧ пышйис.