ЭЗЫСЬ ПӦРТ

Гӧра бердын, саридз бокын олісны вильыш зонкаяс да бӧрдысь нывкаяс. Вильыш зонкаяс мачӧн ворсӧны, лыжи-дадь вылын исласьӧны, лымйӧн шыбласьӧны. Горзӧмныс гӧра йылӧдзыс кылӧ.

Кыр йылас оліс скӧр Лавӧ. Ачыс пельтӧм-синтӧм, паськыд лапа кокъяса, жбырган ныра. Оз радейт сійӧ зонкаясӧс, кор найӧ горулын исласьӧны, ворсӧны да горзӧны. Лавӧлӧн шуйга пельпом вылас рака пукалӧ да кравзӧ. Веськыд пельпом вылас еджыд сюзь бордъяснас шлопкӧдчӧ. Ставсӧ аддзӧ да висьтавлӧ.

Лавӧ скӧралӧ. Чой йывсянь шлывк исковтас. Лым толанас зонкаясӧс гартас, лым сюръяясӧ пӧртас да изъяс бердӧ сувтӧдлас. Тіравтӧдзыс сералас, муртса гӧраыс оз путкыльтчы.

Горулас, саридз дорын зонкаяслӧн мам-батьныс бӧрдӧны. Пӧрысь бабъяс да ичӧт нывкаяс ёна-ёна лимзалӧны. Зонкаясӧс корсьӧны. Ӧти ичӧт нывка воксӧ корсьӧ, мудзис да изъяс дорӧ водіс. А Лавӧлӧн горшыс косьмӧ, шливкнитіс саридз дорӧ сола ва юны. Муртса дзоля нывкасӧ исковтігас эз лязӧд. Юис, шойччыны водіс. Сюзь да рака пукалӧны, ас костаныс сёрнитӧны:

— Ӧні зонъяс ланьталісны, лым сюръяясӧн лоины. Некод найӧс оз мезды.

Лавӧ шуӧ:

— Мездыны сӧмын ичӧт нывкаяс вермасны. Кыр йылас кӧ ыджыд эзысь пӧрт лэптасны. Ыджыд бипур ӧзтасны. Пӧртйын кӧ ва пузьӧдасны. Сэки лым сюръяясыс сылӧны, зонъяс ловзясны.

— Кысь нин няр нывкаяслы чой паныд кайны, — горзӧ рака, — налы сӧмын аканьясӧн ворсны, налы сӧмын кампет нёнявны, паччӧр выланыс мойдъяс кывзыны, шоныдінас долыдпырысь ойбыртны-вугыртны.

Ичӧт нывка тайӧ сёрнисӧ кыліс. Гусьӧникӧн изъяс дорысь пышйис, кутіс ичӧтик нывкаясӧс корны.

— Вайӧ каям гӧра вылӧ, эзысь пӧрт сэтчӧ катӧдам. Ва пузьӧдам, лым сюръяяс сыласны, зонъясӧс мездам.

Чукӧртчисны посни нывкаяс, синванысӧ чышкалісны. Эзысь пӧрт гезйӧн гартлісны. Истӧг да сёянторъяс босьтісны. Гӧра вылӧ мӧдӧдчисны. Эзысь пӧрт йӧткӧны. Коді гырддза вылас усьлас, коді пидзӧссӧ вирӧдз дойдас. Но некод оз бӧрд, надзӧникӧн, но пӧрттӧ кыпӧдӧны.

Дыр-ӧ, регыд-ӧ ичӧт нывкаяс йылӧдзыс кавшасисны, эзысь пӧрт кык из костӧ сувтӧдісны. Тырыс лым ваялісны. Кватитчисны да, некӧн пу ни палич абу. Гӧгӧр лым да из сӧмын.

— Мыйӧн нӧ ми васӧ пузьӧдам? Кыдзи зонъяссӧ мездам?

— Энӧ шогсьӧй, — шуӧ медся ичӧт нывка. — Пӧрччалӧй кӧм-паськӧмъястӧ, энӧ жалитӧй чулки-платтьӧястӧ. Ӧзтам ставсӧ, бипур вӧчам.

Ставӧн пӧрччысисны. Эзысь пӧрт улӧ лӧдісны. Ыджыд-ыджыд бипур лои. Пӧртйын ва пузис, пуркйӧ, ру кайӧ. Гӧра вылын лым сылӧ. Лым сюръяяс сылісны, посни зонъяс ловзисны, видзӧдӧны: посни нывкаяс пасьтӧмӧсь. Пӧрччалісны ассьыныс паськӧмъяссӧ. Быдӧн сідзи и вӧзйӧны вывсьыныс пӧрччӧмасӧ:

— Пасьталӧй, дона нывкаяс, эн кынмӧй.

Ӧдйӧ ставӧн горулӧ лэччалісны. Мам-бать паныд локтӧны, челядьӧс окалӧны.

Лавӧ гӧра горулын бӧрдӧмӧн коли.