ДЗОДЗӦГ-МАМ

Ты дорын, кузь турун пиын дзодзӧг пиянсӧ быдтӧ-шонтӧ. Котралыштасны да, дзодзӧг-мам найӧс велӧдӧ:

— Дзодзӧгъяс-пиянъяс, гӧрд кокаяс, ылӧ эн кывтӧй, энӧ торъялӧй. Ме берегӧ, ті ме бӧрся. Бордӧс кӧ паськӧда, ті борд улӧ. Сэні пукалӧй. Войнас чӧв олӧй, эн шутьлялӧй. А то неылын, кузь пу улын руч кыйӧдчӧ.

Дзодзӧгпиян кывзысьӧмӧн олӧны, оз гогзьыны. Нырнысӧ оз мыччывны. Лун да вой, лун да вой. Дас кык дзодзӧг быдмӧны. Кад воис да, борд улӧ оз нин тӧрны. Дзодзӧг-мамлысь оз нин кывзыны. Ӧти — ӧтарӧ, мӧд — мӧдарӧ.

Дзодзӧг-мам гогзьӧ, пиянӧс корӧ:

— Дзодзӧгъяс-пиянъяс, гӧрд кокаяс, ылӧ эн кывтӧй, пыдӧ эн пырӧй, энӧ торъялӧй, делӧ дорйыны. Локтӧ гортӧ.

— Огӧ, огӧ, — вочавидзӧны.

Пиян пыр ылӧджык и ылӧджык кывтӧны, пыдӧ пырӧны. Позйӧ оз локны. Шонді лэччӧ нин, мам ӧтнас позйын. Бара горзӧ:

— Локтӧ, локтӧ!

— Огӧ, огӧ.

Кыськӧ руч шыасьӧ, ылӧдчӧ:

— Дзодзӧгпиянӧ, локтӧй ме дорӧ. Ме дорын зэв уна ӧмидзыс, мыйта чериыс, быд дзоридз вылын, быд турун вылын лысва юӧны.

Петісны дзодзӧгпиян ва шӧрысь берегӧ. Руч найӧс куталіс, ас позъяс нуис.

— Вот ме пач ломта, дзодзӧгпиянӧс пуа, жарита.

Петіс позйысь руч песла, ӧдзӧссӧ пыкӧдӧн пыкис. А дзодзӧг-мам пиянӧс корсьӧ.

— Кӧн, кӧн, кӧн менам пиянӧй?

Аддзӧ: руч пес вайӧ.

— Руч, руч, эн-ӧ аддзыв менсьым пиянӧс?

— Эг, эг аддзыв.

А коз пу вылын сюзь пукалӧ, зэв сюсь.

— Фу-фу, мыйла, руч, пӧръясян! Дзодзӧгпиянӧс гусялін. Пес ваян, найӧс жаритны кӧсъян. Вай, дзодзӧг, кыкӧн ручсӧ кокалам, синъяссӧ перъялам.

Повзис руч, поз ӧдзӧс восьтіс, дзодзӧгпиянӧс лэдзис. Дзодзӧг-мамлы зэв рад, но пиянсӧ оз ошкы:

— Ноко, ноко, кутанныд-ӧ вильшасьны? Кутанныд-ӧ кывзысьны?

— Ог-ог-ог кутӧй вильшасьны.

— Ок-ок-ок кутам кывзысьны.