ПЛӦТНИК КӦЧ

Оліс-выліс плӧтник кӧч. Мыйӧ босьтчас — сійӧс и вӧчас. Мунӧ вӧрӧд, черыс — вӧнь костын, пилаыс мыш саяс, кӧрт тув, черта, гогын, мерка — чуманын. Паныдасьӧ вурдысь.

— Видза олан, кӧч! Он-ӧ меным поз вӧч?

— Вӧча, вӧча, керйысь тэча.

— Ыджыд-ӧ донысь тэчан?

— Шонтысьны кӧ лэдзан кӧдзыд тӧв дырйи и ладнӧ.

— Бур, — сӧгласитчис вурдысь.

Котш-котш, кув-ков. Вурдысьлӧн поз рыт кежлас гӧтов. Пыр да ов.

Водзӧ мунӧ кӧч. Черыс вӧнь костын, пилаыс мыш сайын, кӧрт тув, черта, гогын — чуманын. Паныдасьӧ руч.

— Видза олан, кӧч! Вай тэ меным керка вӧч.

— Вӧча, керйысь тэча, джуджыд кильчӧа, ӧдзӧс зильган каличӧн.

— Ыджыд-ӧ доныс? Висьтав водзвыв.

— Нинӧм оз ков. Лэдзлы шонтысьны кӧдзыд тӧв дырйиыс.

— Бурӧн ладмам, — шуӧ руч.

Зым-зым, котш-котш, кув-ков. Лун-мӧд и ручлы керка гӧтов. Пыр да ов.

Мунӧ кӧч. Черыс вӧнь костын. Пилаыс мыш сайын. Чуманын став инструментыс. Паныдасьӧны ыж, петук, лягуша да шыр.

— Видза олан, кӧч! Миянлы нёль судта керка вӧч. Улыс судтаас медым гӧлбӧч вӧлі, мед сэтчӧ тӧвбыд кежлӧ сёян-юан тӧрис.

— Вӧча. Керйысь тэча. Улын гӧлбӧч. Сэсся ыжлы судта. Шырлы мӧд судта. Лягушалы — коймӧд. Петуклы — нёльӧд. Ӧшиньяссӧ узорӧн вӧча. Керка гӧгӧр потшӧс лоӧ.

— Ыджыд-ӧ нӧ доныс? Висьтав водзвыв.

— Нинӧм оз ков. Лёк тӧв дырйи шонтысьны лэдзлӧй.

— Бур, бур.

Котш-котш, кув-ков. Сӧмын тӧв кежлӧ керка лоис гӧтов.

Тӧв пуксис. Кӧч чер-пила джаджйӧ пуктіс. Чумансӧ коз лап улӧ дзебис. Шувгӧ лёк тӧв, турӧб синмӧ швачкӧ. Кӧч котӧртіс скачӧн, руд пасьсӧ еджыд вылӧ вежис. Вурдысь дорӧ кежис.

— Тар-тар, вурдысь, лэдз менӧ шонтысьыштны. Пӧсь чайӧн юктӧд.

— Коді тэ? Мыйкӧ тай ме тэнӧ ог тӧд.

— Ме кӧч — плӧтникыд, коді тэныд позтӧ вӧчис.

— Мун татысь, меным руд кӧч позсӧ вӧчліс. А тэ дзик еджыд.

Котӧртіс кӧчыс руч керкаӧ. «Зиль-зиль», — ӧдзӧс каличӧн зилькӧдчӧ.

— Коді сэн?

— Ме кӧчыд, коді тэныд керкатӧ вӧчис.

— Весась татысь, меным керкасӧ руд кӧч вӧчис, а тэ со еджыд.

Котӧртіс кӧч нёль судта керкаӧдз.

— Тотш-тотш, — игӧдчӧ.

— Коді сэн?

— Тайӧ ме, кӧч, плӧтник. Зэв нин кӧдзыд лои. Еджыд пась со вежи.

Шыасьӧ ыж:

— Ӧтар джынъяс тырыс турун. Шӧрас ачым ола. Биысь ёна пола. Шыр дорӧ вӧзйысь.

Шыр зэв ёна повзис:

— Ме дорӧ эн пыр, шырпиян дзик тыр.

Кӧч кайис коймӧд судтаӧ.

— Котш-котш, лягуша — небыд душа. Лэдз менӧ шонтысьны.

— Коді тэ?

— Ме кӧч, плӧтник, тэныд тайӧ оланінсӧ вӧчлі.

— Мый нӧ водзджык тэ эн лок? Ме ордӧ гӧсть рак-вок воис. Дзескӧдны сійӧс ог кӧсйы, дӧзмӧдны сійӧс ог лысьт.

Кӧч кайис нёльӧд судтаӧ.

— Тук-тук-тук! Видза олан, петук! Тэ ордын шонтысьышта ӧти здук. Лэдз менӧ.

— Лэдза эськӧ да, сӧмын вот гӧтраси. Позйын чипанъяс олӧны. Быдӧнысь полӧны.

Петіс кӧч-плӧтник керкаысь. Ас бӧрсяыс ӧдзӧс пӧдлаліс. Лапанас пельяссӧ шамыртіс. Забеднӧ лои — бӧрддзис. Котӧртӧ пон.

— Мый нӧ бӧрдан, кӧч?

— Гожӧмбыд быдӧнлы позъяс вӧчи. Сӧмын аслым эг эшты. Кынмыны куті, а шонтысьны некод эз и лэдз.

Пон и шуӧ:

— Лок ме ордӧ. Менам эм вон. Сэні тӧлыс озджык шутьляв.

Вонйын понкӧд и тӧвйисны.