ДӦРӦШ МИШ

Оліс ӧти сиктын мудер Дӧрӧш Миш. Челядьыс — пӧлать тырыс, идйыс ен ув пельӧсын, няньыс — варттӧм, сьӧмыс — чӧрӧс пытшкын, шудыс шеш вомас, эмбурыс — сигӧр улын. Олӧ-вылӧ — шог оз тӧд. Челядьсӧ серамӧн вердӧ. Мелі вомнас гӧтырсӧ радейтӧ.

Ӧтчыд локтӧ Дӧрӧш Миш вӧлӧкысь туй кузя — ёна мудзис и пӧсяліс. Туй бокӧ пуксис, шапкасӧ пӧрччис, луд вылас орччӧн пуктіс. Видзӧдӧ: вӧла-доддьын озыр Паш гӧнитӧ, аддзис Миштӧ.

— Мый нӧ пукалан, сусед? — горӧдіс-юаліс.

— Зарни бордъя лэбачӧс куті, позйыс вот абу, а кольнысӧ пола. Лэбас. Он-ӧ тэ кутышт, а ме тэнад вӧлӧн позйысла гӧнитла.

— Кутышта, ветлы.

Чеччыштіс вӧв доддьӧ Дӧрӧш Миш да гӧнитіс. Дыр пукалӧ озыр Паш, шапка кутӧ да мӧвпалӧ: «Эз-ӧ кув нин зарни бордъя лэбачыс? Чӧв тай олӧ».

Надзӧникӧн шапкасӧ восьтіс да восьтіс, а сэні — тыртӧм, некоді абу. Ёна и скӧрмис озыр Паш!

Сэк кості Дӧрӧш Миш вӧвтӧ вузаліс да гортъяс вӧчалысь дорӧ муніс. Ньӧбис ас кузяыс горт. Кольӧм сьӧмсӧ гӧтырыслы сетіс да шуӧ:

— Ме гортъяс вода, быттьӧ кулі, а тэ ме дінын пукав да бӧрд. Озыр Паш кӧ локтас — преставитчис, шу, кувсис Дӧрӧш Мишыд.

Недыр мысти озыр Паш локтіс, скӧрысь ӧдзӧссӧ восьтіс:

— Кӧні Дӧрӧш Мишыд? — горзӧ.

— Кувсис менам верӧсӧй, преставитчис Дӧрӧш Мишыд. Коді сэсся семьяӧс вердас? — висьталӧ нывбаба и кыз синваӧн бӧрдӧ.

Век на скӧралӧ озыр Паш, синсьыс би сявкйӧ.

— Вай кӧть ме сылы вомас сьӧлышта, — шуӧ озыр Паш. Копыртчис поконик дорӧ, сьӧлыштны лӧсьӧдчӧ, а поконикыд Пашлысь нырсӧ вазнитіс-курччис.

Кыдзи тай горӧдас озыр Пашыд, мый поконикыд курччасьӧ, садьтӧгыс ӧшинь пырыс чеччыштіс да коксӧ чегис. Бӧрдӧ да ойзӧ.

Жаль лои Дӧрӧш Мишлы озыр Пашыд, гортсьыс чеччис да бӧрдысь дінӧ матыстчис. А мӧдыс матькӧ:

— Ак тэ, сӧкъя тшак, ну менӧ кыдз кӧсъян, со кокӧс чеги.

— А мыйӧн ме тэнӧ нуа?

— Мыш вылад босьт да и ну!

Нинӧм вӧчны. Босьтіс мыш вылас Пашӧс, киня улас коксӧ кутӧ. Сідзи и мӧдӧдчисны. А Пашыд сёй пестер кодь, сьӧкыд. Пӧсь петтӧдзыс кашкис-нуис. Водзын ыджыд мыр тыдалӧ. «Вай жӧ шойччыштам», — шуӧ. Лажгӧдчыштіс, мыш вывсьыс Пашӧс лэдзис. А мырыд абу и мыр вӧлӧма, восьса юкмӧс. Буз-базмуні озыр Пашыд юкмӧсад.

— Ак, сё мокасьт, ерӧмакань, неладнӧ тай лои.

Юкмӧс пытшкӧссянь озыр Паш горзӧ, срубйӧд каттьысьӧ, но кайнысӧ оз вермы.

— Отсалӧй, лэптӧй! — бӧрдӧ. — Кӧні тэ, Дӧрӧш Миш?!

— Нӧрӧвитлы, гез корсьла.

Видзӧдӧ, тувъялӧм майӧг помӧ гез кӧрталӧма. Эз и видзӧдлы мӧдар пом вылас, разис да котӧрӧн юкмӧс дорӧ. Лэдзис гез помсӧ. Кватитіс гезсӧ озыр Паш и друг кодкӧ сійӧс зэв ӧдйӧ кутіс лэптыны. Видзӧдліс Дӧрӧш Миш, а гез мӧдар помас ӧшкӧс сюрӧдыс домалӧмаӧсь. Ӧшкыд скӧрвывсьыд нетшыштчис да озыр Пашыд мач моз сылӧн паськыд сюръяс костас пуксис. А ӧшкыд повзис, скачӧн гортӧдзыс гӧнитіс. Аслас вӧлӧма ӧшкыс, озыр Пашӧс гортӧдзыс сюръяс вылас вайӧдіс-зӧрӧдіс.

— Мыйкӧ тай нӧ вӧв вылын мунлін, а ӧш вылын воин? — юалӧ гӧтырыс.

Нинӧм татчӧ оз сяммы шуны Паш, мыш горувсӧ малалӧ да сӧмын ымзӧ.