НЕМАС УДЖ

Ӧшинь водзын бабӧ печкӧ. Паччӧр вылын дедӧ куйлӧ. Тӧлын войыд кузь, кӧть лун и вой узь.

Дедӧ паччӧр вылысь лэччылас, сёяс-юас да бара каяс. Бабӧ став кудельсӧ печкис.

— Дедӧ, мый нӧ кута вӧчны? Кудельӧй помасис. Ставсӧ печки, ставсӧ путшки.

Дедӧ лэччис паччӧрысь, видзӧдліс шӧрт вылӧ.

— Кутшӧм нӧ тайӧ тэнад шӧрт? Омӧль, путшкы выльысь. — Ачыс бара кайис. Ружтӧ, ус-тошсӧ гыжъяснас вуштӧ. А сэсся горӧдіс радпырысь: — Бабӧ, бабӧ, эм тэнад удж! Пуксьы пидзӧс вылӧ, печкы менсьым паськыд тошкӧс. Шӧрт сэсь бурӧс печкы. Петля-сияс ме вӧча. Вӧрӧ лэчьяс пуктала. Гашкӧ, пӧтка шедӧ, гашкӧ, ур.

— Бур, — шуӧ бабӧ.

Кайис бабӧ паччӧр вылӧ. Пуксис дедлы пидзӧс вылӧ. Дедӧлысь тош нетшкӧ да печкӧ. Сэсся путшкис. Лои вӧсни ён шӧрт. Дедӧ паччӧр вылысь лэччис. Тош местасӧ малалӧ. Вӧчис лэчьяс. Пасьтасис да вӧрӧ муніс. Коз пу улӧ лӧсьӧдаліс лэчьяс. Мӧд асыв найӧс видлыны муніс. Аддзӧ — руч шедӧма.

— Вот и дивӧ! Кӧть и тошкыд дона, руч шедӧма. — Муртса разьны вермис. — Ӧні ме ог йӧрмы. Рынок вылын кусӧ вузала. Ньӧба мича дӧрӧм. Бабалы выль колош, платтьӧ вылӧ дӧра, аслыс платтьӧ вурас.

Вайис гортас ручӧс. Баблы зэв любӧ. Дедӧ шуӧ:

— Бабӧ, руч кусӧ рынокын вузала. Аслым ньӧба дӧрӧм, тэныд колош, платтьӧ вылӧ дӧра.

— Мый нӧ, дедӧ, сӧран? Тэнад эм на дӧрӧм. Менам кӧті сӧмын на кыклаті поті. Ӧти пӧлыс розя. Новлыны на позяс. А мыйла меным платтьӧ? Некытчӧ ог ветлыв. Кильчӧ помӧ петны сарапанӧй туяс.

— Мый нӧ эськӧ ньӧбам?

— Ньӧбам еджыд ыж. Лоӧ вурун. Тӧвбыд бара печка. Тэ гожӧмнас турун ытшкан. Кыкнаннымлы удж лоӧ.