ЕНЪЯС, ПОПЪЯС ВЕЖСЬӦНЫ

Важӧн Комилӧн енъясныс вӧлӧма: вӧрса, васа, олыся. Медыджыд енъясыс налӧн вӧліны: Войпель, Зарни ань. Сэсся коми йӧзлӧн вӧлі быдсяма тӧдысьяс, тунъяс. Йӧз ёна полісны енъясысь. Пыр найӧ кевмысисны налы тунъяс пыр, ваялісны быдсяма козин. Витсё во сайын воис коми муӧ Перымса Степан. Сійӧ вайис Кристос вера. Дыр эз сетчыны коми йӧз Степанлы: эз вежны ассьыныс енъяссӧ Кристос вылӧ. Дерт, дырнад Степан коми йӧз костын паськӧдіс Кристос вератӧ. Коми йӧзлысь тунъяссӧ вежлаліс попъясӧн. Ёна тунъяс вермасисны Степанкӧд. Жаль вӧлі налы докодсӧ сетны попъяслы. Торъя дыр Степанкӧд вермасис медбӧръя Пама нима тун. Сэсянь коми йӧз веськалісны Кристос вераӧ, поп-дяк кипод улӧ. Сэсянь сэсся эз нин личлэдзлыны попъяс коми йӧзӧс, пыр ӧтарӧ йӧйтӧдлісны, повзьӧдлісны мӧдаръюгыдӧн, адӧн. Пыр лои коми йӧзлы шоныд, югыдінтӧ мӧдаръюгыдсьыд ньӧбны енъяслысь поп-дяк ки пыр мӧскӧн, дӧраӧн, пирӧг-шаньгаӧн да быдсяма мукӧдторъясӧн. Комияс ассьыныс енъяссӧ эз на вунӧдны ӧнӧдз. Рыныш айкаыд, пывсян айкаыд, олысяыд, омӧльыд, ёмаыд, вакульыд, — ставыс на коми йӧзлӧн олӧны-вылӧны. Натӧг весиг на воськов оз тувччы коми.