ТӦВ НЫР

Лӧнь. Ставыс ланьтӧма. Кытчӧкӧ вошины лэбачьяс, оз дзизгыны, сьывны малязіяс, чиркъяс. Кодзувкотъяс пырӧмаӧсь пыдӧ ас позъяс. Пуяс ланьтісны, сулалӧны веськыда; сӧмын корсюрӧ копыртлӧны юрнысӧ, вашкӧдчӧны, со пӧ виччысьӧй ыджыд тӧв, зэр. Ыджыд сьӧд кымӧр вевттис став енэжсӧ. Быдӧн мӧдісны идрасьны ывлаысь гортӧ, пӧдлавлісны ӧшинь-ӧдзӧсъяс. Пӧльыштіс тӧв, вайис юӧр: «регыд нин пӧ», ачыс сэсся воши кытчӧкӧ. Сы бӧрын кыптіс зэв ыджыд тӧв. Ывла тыр лэптысис тшын-бус, мӧдіс гӧгрӧдлыны став ёгсӧ ывла вылысь. Чукӧртіс ӧтчукӧрӧ, швачкис- пӧдлаліс восьса ӧшинь-ӧдзӧсъяс, и лэбигмозыс вӧтліс петук-чипанъясӧс ывла кузя, вылӧ лэптӧма налысь бӧжъяссӧ. Сэсся кытыськӧ дзурк орӧдіс дзиръя ӧдзӧс; гиль-голь швачкис ӧшиньӧ. Сэсся недыр мысьт мӧдіс шаргыны — зэв гырыся зэрны, гымаліг-чардалігтырйи.