ЛЭБАЧЬЯС МӦДӦДЧӦМАӦСЬ

Вель важӧн нин кисьмӧма вотӧс, петӧма тшак. Челядь ӧти да мӧд оз быравлы вӧрысь. Коді оз вотӧ, коді чӧдлач. Вотчӧмнысла талунӧдз абу на казявлӧмаӧсь лэбачьяслысь ланьтӧмнысӧ. Быдлаын на эськӧ кайяс жбыръялӧны да, сӧмын оз сьывны воддза моз. Чипсӧны, шогсьӧны, унаӧн дзебсялӧмаӧсь. Кӧк эськӧ кутшӧм нин долыд бана ань да, весиг сійӧ оз шыасьлы ӧні. Уна кай сідзи ланьтӧмаӧсь. Ставныс на эськӧ эмӧсь, некод некытчӧ оз мун да. Мыйла нӧ ланьтӧмаӧсь? Вӧлӧмкӧ, кайяслӧн эштӧма уджыс: чужтыссьӧма, быдтыссьӧма. Ӧні найӧ вежӧны ассьыныс вывтырнысӧ. Важ гӧныс мисьтӧммис, киссис. Колӧ выльӧс шоныдӧс лӧсьӧдны. Со, вӧлӧм, найӧ мый керӧны, ланьтӧмаӧсь да. Важ гӧныс налӧн надзӧникӧн гылалӧ гожӧм шӧрнас. Сэки лэбачьяс шогсьӧны, висьӧны. Быдӧнысь полӧны, дзебсясьӧны, кытчӧсюрӧ, мед эськӧ некод нин оз казяв.

Арладор лунысь лунӧ сёян бырӧ лэбачьяслӧн. Тшыг лэбачьяс чукӧрӧн шӧйтӧны асывсянь рытӧдз — корсьысьӧны кынӧмпӧт. Кынӧм коньӧръяслӧн оз пӧтлы. Лэбӧны саридз сайӧ, шоныдінӧ чукӧрӧн. Быд чукӧрын эм нырщик — тӧдысь лэбач, ныралысь лэбачьяс лэбӧдӧны лэбач чукӧрӧс тӧдса туйӧд, найӧ эз нин кӧнкӧ ӧтчыд лэблыны саридз сайӧдзыд, тӧдӧны кытчӧ сёйны, юны, узьны позьӧ сувтлыны. Ныралысь лэбач мам моз дзонь чукӧр вӧснаыс тӧждысьӧ, видзӧ быдторйысь.

Мудзас кӧ ӧти нырщик, вежсьӧ мӧд, коймӧд. Шойччигъясын да сёйигъясын нырщикъяс дӧзьӧритчӧны. Нырщикъяс чукӧрсӧ нуӧдӧны тӧвбыд кежлӧ уна сёяна инӧ.