КЫДЗИ МАШУК ВЕЛАЛІ ВУНДЫНЫ

Водз асыв. Муртса на кыпӧдчӧ шонді. Асыввылын кыа нюжӧдчӧма, быттьӧ гӧрд визя вӧнь. Гӧгӧр шы ни тӧв. Му уджалысьяс чеччӧны водз. Быд пачысь петӧ тшын. Бабаяс пуӧны-пӧжалӧны, лӧсьӧдчӧны вундыны.

Ӧсип Иванлӧн уджалысь сӧмын кык: гозъя, сёйысьыс вит.

— Таво, — шуӧ Иван: — Машаӧс вундыны велӧдам, немас отсӧг. Анна да Васюк горт оласны.

Сёйыштісны пызан сайын да ӧдйӧнджыка кайисны куимӧн му вылӧ. Машалӧн мамыс моз ӧдйӧ да бура оз артмы.

— Чарлаӧй, — шуӧ: — ныж — оз вунды.

Мам велӧдӧ: «Тэ пӧ со кыдз чальтӧ читкыльт, эн кыскав. Оз ӧд полігтырйи ков вундыштныд».

Маша полӧ чарласьыд. Коскыс сылӧн мудзӧ. Чальсӧ кыкысь кымын нин вундіс, эз жӧ эськӧ дӧбельки да. Сэсся дырӧн Маша кольтатӧ тыртіс да, йиавныс оз куж. Коркӧ сэсся мам отсалӧмнад вундыны и йиавны велаліс. Машук лунтыр вундіс. Сӧмын лун шӧр кадын пуксьылісны сёйыштны. Шонді лэччӧм бӧрын нин воисны гортас. Маша эз ю ни сёй, водіс пӧлатяс да эз садьмыв асылӧдз.

Аскинас бара кайисны му вылӧ. Машуклӧн дзулляыс кын, ки и гӧгӧр висьӧ тӧрытъя уджысь. Бара лои мырдӧнпырысь рытӧдз вундыны. Сэсся кык зэра лун ставнысӧ шойччӧдіс. Сы бӧрын Машалы кокниджык лои вундыны.