ИЧӦТ ЧЕРИ

Югыд визув ваын 
Еджыд кельчи оліс, 
Лыа дорті ветліс, 
Шӧрӧ петны поліс.

«Ме пӧ ичӧт чери, 
Кыдзи сэтчӧ муна?
Ветлӧны пӧ сэні 
Гырысь чери уна!»..

Ӧтчыд сійӧс аддзис 
Лыа дорысь ёді, 
Бӧжӧн люг-лег керис, 
Юалӧ: «Тэ коді?»

Ӧтьвед видзис кельчи: 
«Позьӧ менӧ тӧдны, 
Ичӧтик ме чери;
Шӧрӧ ог лысьт петны!» 

Шуис сылы ёді:
«Нинӧм тэныд повны,
Талунсянь тэ верман
Джуджыдінын овны.

Кӧрталӧма, куйлӧ 
Медся ыджыд сирыс. 
Оз нин киссьы важ моз  
Ичӧтъяслӧн вирыс.

Ичӧтъяслы ӧні
Воссис зарни вӧля.
Кывзӧй, коді посньыд, 
Кывзӧй, коді пеля!»

Лыа дорсянь кельчи
Джуджыдінӧ петіс:
Вӧля йылысь юӧр 
Збойлун сылы сетіс.

Некӧн абу сиръяс, 
Быри гырысь чери. 
Посньыдъясӧс некод 
Оз нин орӧд шӧри.

Аддзис еджыд кельчи 
Лӧсьыд вӧльнӧй олӧм. 
Сьӧлӧм сылӧн гажмис, 
Воши сылӧн полӧм.