КАПУСТА БОБУВ

Детина вайис батьыслы градйӧрысь кутӧм еджыд бобув.

— Аттӧ, мат тай татшӧм бобулыс кӧ уна лоӧ. Став капустатӧ сёясны.

— Сэтшӧм горш тайӧ, батьӧ? — юалӧ детинаыс.

— Бобулыс эськӧ ачыс абу горш да, челядьыс тай талӧн некытчӧ туйтӧмӧсь, пӧтлытӧмӧсь. Став капустатӧ сёясны.

— Кутшӧмӧсь нӧ, батьӧ, талӧн челядьыс? Ас кодьысӧсь жӧ?

— Абу. Тайӧ бобулыс ваяс зэв уна посньыдик еджыд кольк. Колькъяссьыс петасны вывті горш гагъяс. Сэтшӧм горшӧсь, дугдывтӧг сёйӧны. Сійӧ и удж налӧн — сёйӧны да быдмӧны. Быдмасны да ёкмыльтчасны кыш пиӧ, тӧбӧм кага кодьӧсь лоӧны, аканьӧн сэк шусьӧны. Аканьясыс оз сёйны ни оз юны, пыр ӧтилаын, ньӧти вӧрзьӧдчывтӧг, куйлӧны. Сійӧ аканьсьыс этатшӧм бобулыд и петӧ. Дженьыд тайӧяслӧн нэм помыс. Колькъялас бобулыд, петасны гагъяс, сэсся акань наысь лоӧ, аканьысь — бобув; бобув колькъялас, ачыс кулӧ кутшӧмкӧ кор вылӧ. Колькъясысь бара гагъяс петасны.