ВИДЗ-МУВЫВСА КОЛАН БЫДМАНТОРЪЯС

Долыд жӧ нин гожӧм пуксигад муяс вылад видзӧдныд. Неважӧн на вӧлі вежӧдӧ, ӧні сюыд морт суда нин, копрасьӧ шепъяснас. Кузь усъяснас идйыд шептавны мӧдӧма. Зӧрйыд, лысъяс моз, лӧзалӧ. Веж, мича — воӧма шабді. Кӧнсюрӧ, пыдынджык, бокынджык, челядьысь анькытшыд дзебсясьӧ.

Гажа, кыпыд сэки видзьяс вылад и. Ӧтарӧ видзӧдлан — ставыс гӧрд бобӧнянь дзордзалӧ. Мӧдарӧ — еджыд дзоридзьяс. Со, сэні ситурун, эзысь моз, югъялӧ. Мыччысьӧ быдсяма пӧлӧс дзоридзьяс.

Гожӧмбыд видз-мувывса дзоридзьясыд быдмӧны, дзордзалӧны, воӧны. Войдӧр воӧны турунъяс, сэсся вӧлись няньяс. Налӧн кузь коръясыс гылаліны надзӧникӧн, идзас вижӧдӧ, шеп тырсялӧ.

Видз-мувывса быдманторъяс мортлы бур вайӧны. Сюысь, идйысь, шобдіысь, зӧрйысь вӧчӧны пызь, шыдӧс; идзассӧ скӧтлы вердӧны. Шабдіысь печкӧны шӧрт, шӧртысь дӧра кыӧны. Бобӧнянь, ситурун, шыранькытш — мукӧд пӧлӧс турун и — скӧт сёян вылӧ мунӧ. Катшасинмысь, зверобойысь, пӧльӧюрысь да уна мукӧд турунысь и вӧчӧны лекарствояс.