ШЕМЕЛА
Квайт арӧса Коля эз вермы ӧти местаын шаня пукавны. Но дзик визув ёль кодь. Быттьӧкӧ кодкӧ сійӧс чеплялӧ. Некодӧс кывзыны оз кӧсйы. Весиг узьӧ крӧвать вылас; кокъясыс пӧдушка вылын. Либӧ крӧвать вомӧныс увлань юрӧн. Эшкыныс век усьӧма.
Мам-батьыс ӧлӧдӧны:
— Ӧти здук кӧть пукалышт... Оз.
Коля нин паччӧр вывсянь чеччалӧ, гардероб вылӧ кавшасьӧ...
Батьыс ньӧбис вугыра шатин. «Оз-ӧ пӧ вуграсигӧн степенитчы». Босьтіс Коля вугыра шатин, муніс ю дорӧ вуграсьны. Но и сэн эз вермы лючки пукавны кыдз колӧ чери кыйигӧн. Ерӧшитчис... да и бызмуні ваӧ. Бур кӧть эз вӧв джуджыд. Петны кутіс ваысь... Кыськӧ-мыйкӧ, кодкӧ голя вылас кавшасис да сьылі гӧгӧрыс гартчис. Коля повзис, чирӧстіс, кинас кӧсйӧ шыбитны кортӧм пемӧссӧ, но сійӧ нӧшта на ёнджыка гыжъяснас самасис голя гӧгӧрыс, садьтӧгыс Коля котӧртіс гортас. Гортас некод эз вӧв. Ставӧн удж вылын. Коля видзӧдліс зеркалаӧ... Сьылі гӧгӧр да юрсӧ Колялысь шамыртӧма ичӧтик дед — квайт черань кока. Синъясыс югъялӧны.
— Коді тэ? — горӧдіс Коля.
— Шемела дед. Зэв нин пӧрысь да, ачым ог нин вермы прӧмышляйтны. Кута тэ вылын овны, а тэ менӧ вердны-юктавны кутан. Менӧ шыбитны он вермы, гыжъясӧс сюя кучик улад. Дойман.
Колялӧн пыр и косьмис юан горшыс. Гумовтіс кӧш ва, кӧсйӧ юны, а Шемела кватитіс сылысь кӧш да став васӧ юис-гулькнитіс. Коля босьтіс выя нянь шкапысь, и сійӧс Шемела кватитіс да сюйис гӧна вомас. Сӧмын нянь чирйыс гылалі Колялы питшӧгас.
Коля ӧтарӧ-мӧдарӧ кутіс шӧйтны кухняӧдыс. Син улас уси шкапсьыс батьыслӧн джынйӧдӧм водка сулея. Мӧвпыштіс: «Гашкӧ, юас водкасӧ да коддзас»... Кисьтіс стӧканӧ тырыс, кӧсйӧ быттьӧ юны, а Шемела юалӧ:
— Мый тайӧ?
— Лимонад, зэв юмов, — шуӧ Коля. — Эн мырддьы.
Шемела кватитіс стӧкан водкатӧ да ӧтпырйӧ юис-гулькнитіс. Синмыс плешкас кайис. Пыр и коддзис. Кок гыжъясыс слабитісны.
— Мый тайӧ?!.. — горӧдіс Шемела, шмоткысис джоджӧ.
Коля босьтіс укват да шыбитіс сійӧс ӧшинь пыр пес чипас бердӧ. Бугыльясыс Шемелалӧн гылалісны, кык черань кок чегис...
Мунӧ Шемела люті-леті, быдлаӧ зурасьӧ. Аддзанныд кӧ, чужйӧй, мед эськӧ некодлы оз сибӧдчы пеж гагыд.
