ГОЖӦМЫН МУ ВЫЛЫН

Гажа да кыпыд жӧ нин бара гожӧмнад муяс вылад! Вӧр дорсяньыс чой горулас быттьӧ котӧртӧны уна сикаса нянь тыра муяс. Со, гызьӧма зарниа сю му; ёнмӧдчӧ, вынмӧдчӧ сӧстӧм сынӧднас. Со, зӧрйыс лӧзалӧ. Пыдынджык читкыля юрнас анькытш дзебсясьӧ. Нӧшта водзынджык шабді дӧлалӧ мича енэж кодь лӧз синъяснас.

Колипкай зёльзьӧ-качӧ сю му весьтын. Вылын-вылын сера кутш гоньялӧ; оз-ӧ сюр лэбач сю пиысь вартны, либӧ шыр, позъяс котӧртігас. Гӧгӧр чиркъяс сьылӧны, чеччалӧны. Туй вывті дзуртӧ веж турун тыра телега, чӧскыд дукыс ыпйӧ чужӧмад.