МАЙ ТӦЛЫССЯ МЕДВОДДЗА ЛУН

Тулысын ловзьӧ став ывла вылыс. Му мездысьӧ йиысь-лымйысь. Ывлаыс ставнас сьылӧ, дзордзалӧ, нимкодясьӧ. Сӧмын озыр йӧз ордын шойччывлытӧг уджалысь гӧль йӧз шога мӧвпалӧны:

«Дыр-ӧ бара ми огӧ шыблалӧй кӧртвомнымӧс, чепъяснымӧс; дыр-ӧ бара миянлы оз во гажа тулысыс?»

Тайӧ луныс, медводдза май луныс — став мувывса уджалысь, мырсьысь-тільсьысь йӧзлӧн праздник, ыджыд праздник. Сӧвет Республикаяс Союзын уджалысь, мырсьысь йӧз петӧны уличӧ, гӧрд пасъясӧн найӧ казьтылӧны-нимкодясьӧны асланыс мезмӧм вылӧ, озыр кабырысь мынӧм вылӧ. Мукӧд государствоясын озыр власьт улын олысь уджалысь йӧз петкӧдлӧны ассьыныс ӧтувтчӧмсӧ, вынсӧ озыр йӧзлы, власьтныслы, гӧрд пасъясӧн, сьылӧмӧн, мед тӧдӧны, аддзӧны озыръяс ассьыныс пом матысмӧмсӧ. Коркӧ, надзӧникӧн му пасьталаас власьтыс лоӧ уджалысь йӧз киын, Сӧветъяс киын. Тайӧ луныс — став мувывса уджалысь гӧль йӧзлӧн ӧтувтчан лун. Тайӧ луныс шусьӧ сы понда Интернациональнӧй лунӧн.