КУТШӦМ ОЛӦМ ЛОӦ МӦДЫСЬ ЙӦЗЛӦН

Васюк, карсьыс быдсяма дивӧсӧ аддзылӧм бӧрад, вӧтасьӧ зэв ёна. Ыштӧ сійӧ: зэв ыджыд лэбач вылын пукалӧ, лэбӧ. Ылысянь тыдовтчис зэв паськыд кладбище. Ставыс гуясыс гӧрд нойӧн, гӧрд дзоридзьясӧн вевттялӧма. «Мыйта гуясыс, кодъяслӧн бара тайӧ-а? — мӧвпыштіс Васюк. — Тайӧ гуясыд революционеръяслӧн. Со, ӧнія выль олӧмсӧ лӧсьӧдысьяслӧн», — шыасис Васюк улын лэбач юсь. Васюк быдӧн чуймис юсь сёрнитӧм вылӧ.

Надзӧникӧн матысмыны кутісны тӧдтӧм карӧ. Став карыс сад пиын, дзоридз пиын.

Кар вылас шлывъялӧны аэропланъяс. Тані йӧз оз нин ветлӧдлыны, — пӧткаяс моз лэбалӧны. Тані некод оз уджав киӧн, став уджсӧ ӧдйӧ, лӧсьыда, кокньыда вӧчӧ машина. Став йӧзыс тані гырысьӧсь, ёнӧсь, дзоньвидзаӧсь. Кодкӧ кӧ висьмас, сійӧс писькиаліг моз жӧ, писькиалӧны. Сэтысь сійӧ пырысь-пыр бурдӧ. Вывті кокни тані йӧзлы овны. Найӧ ньӧтчыд оз мудзлыны. Тані абу озыр ни гӧль, ыджыдалысь ни ичӧталысь, — ставныс ӧтыждаӧсь. Быдӧн быдторйысь судзсьӧны. Мӧда-мӧдлысь оз ков мырддьыны, нетшкыны: быдӧнлӧн быдтор тырмӧдз. Ставныс олӧны, вокъяс-чойяс моз, ӧтув.

Гажаа, ӧтвылысь найӧ пыр уджалӧны (машинаяс бӧрся сӧмын видзӧдӧны). Праздник вылӧ моз мунӧны удж выланыс найӧ, — сэтшӧм налы кокни да гажа. Праздник вылысь моз гортаныс локтӧны сьыліг-ворсігтырйи.

Удж бӧрын оз ӧткӧн-ӧткӧн аслыныс пельӧсъясын дзебсясьӧмӧн овны.

Найӧс мӧда-мӧд дінас кыскӧ, найӧ ӧтлаын шойччӧны, ӧтлаын гажӧдчӧны. Уджныс налӧн вывті гажа праздник кодь, сьылана-йӧктана. Тадзи висьтавліс, лэбигмозыс, юсь Васюклы. Збыльысь Васюк аддзӧ синнас сэтшӧм олӧм, сэтшӧм шуда йӧзӧс.

— Медтӧ коркӧ миян татшӧм олӧмыд лоӧ! — вашкӧдӧ зэв вежалӧмпырысь Васюк.

— Лоӧ, ас саяныд татшӧм олӧмтӧ лӧсьӧдӧмыд. Кужӧй выль олӧм лӧсьӧдны, том войтыр! — горӧдіс юсь Васюклы пеляс. Васюк горӧдӧмысь садьмис. Вӧлӧмакӧ, вӧт. Сӧмын Васюк аслыс чорыда кӧсйысис выль олӧм дорны босьтчыны.