СМЕЛДЖЫКА, ВОКЪЯСӦЙ, ВЕТЛӦЙ!..

Смелджыка, вокъясӧй, ветлӧй, — 
Кось вылын ёнмӧдчам ми.
Вӧлясӧ аддзас и босьтас
Уджалысь мортыслӧн ки.

Гӧрысьяс шӧрысь ми петім, — 
Гӧрысьӧс некод оз йӧрт. 
Ӧтувъя олӧм да вӧля — 
Вот миян меддонатор.

Дыр нин ми сьӧкыда олім;
Тшыгъялім, коньӧръяс, дыр; — 
Кольӧма кымӧра лунъяс,
Пузьӧдчис сьӧлӧмын вир.

Вермасьны лёк йӧзкӧд колӧ, 
Прӧста мед некод оз ов.
Лёк йӧзысь, саръясысь ӧні 
Уджалысь йӧз оз нин пов.

Гӧль вылын пукаліс сарыс,
Векысянь гӧль вӧлі тшыг.
Асьным ми ружйӧяс вӧчам,
Лэчыда кеслам ми штык.

Чукӧртчам ӧтлаӧ, вокъяс,
Ӧдйӧ, эн думайтӧ дыр.
Вермасьны, косясьны пондам, 
Кытчӧдз лёк йӧзыс оз быр. 

Орйӧдлам ми чорыд киӧн
Сарлысь да озырлысь гез.
Вӧлясӧ аддзас и босьтас
Век кежлӧ уджалысь йӧз.