ЗАВОДЫН

Васюк батьлӧн тӧдсаыс вӧлі заводын уджалысь (рабочӧй).

Коркӧ сійӧ юаліс Майбыровлысь:

— Гашкӧ, миянлысь заводнымӧс видзӧдлан да?

— Зэв эськӧ гаж петӧ видлавны да.

Мӧд луннас Петыр Семӧ Васюккӧд мунісны завод видлыны.

Завод дінас матысмигӧн на Васюк аддзис аслыссяма каменнӧй гырысь керкаяс. Зэв уна джуджыд гырысь трубаяс дӧввидзӧны ылісянь. Стӧрӧж найӧс лэдзис пытшкас. Медвойдӧр веськалісны найӧ заводса гижанінас (контораас). Васюклы петкӧдлісны директорсӧ, инженеръясӧс, уна пӧлӧс служакӧс заводсьыс. Сійӧ заводыс кӧрт завод вӧлӧма. Сэні кӧртысь вӧчалісны быдсяма пӧлӧс кӧрта кӧлуй. Сэсся Майбыров ая-пиа пыралісны чугун кисьтанінӧ. Видлалісны и мукӧдлаті. Васюк ёна шензис заводса олӧм вылӧ. Сійӧ эз чайтлы сэтшӧмӧн заводтӧ. Вывті ыджыд зыкӧн-шумӧн кӧрттӧ ваялӧны посньыдик кӧлесаяса вагонъясӧн пачьяс дорас. Пачьясыс керка гырсяӧсь, кӧртыд вый моз сэні сылӧ. Кӧртсӧ пачьяссьыс шыблалӧны. Сэтысь кыскалӧны быдӧн аслыссяма машинаясӧн.

Ёна Васюк шензис вывті гырысь машинаяс вылас. Дзикӧдз пельыс сылӧн чуналі, ачыс чуймис ыджыд зыксьыс-шумсьыс.

— Ёна жӧ, тыдалӧ, сьӧкыд тані уджавныд, — шуис Васюк батьыслы.

— Дерт эськӧ, абу кокни тані уджыд да, сӧмын ӧдйӧ артмӧ. Та гырся машинаясыдлысь муртса уджалӧмсӧ, морт киӧн кӧ, лои сё воысь дыр уджавны. Заводъяс, машинаяс ӧдйӧ дай бура уджалӧны.