ЫДЖЫД КАРЫН

Сійӧ карыс вӧлі зэв ыджыд. Васюк тайкӧ батьсӧ кӧрт туй станция вылас воштас. Вокзал гӧгӧрыс уна вӧла сулалісны, найӧ йӧзӧс новлӧдлӧны, воысьяссӧ карас нуӧны. Васюк батьыскӧд эз мунны вӧлӧн, дона да. Найӧ мунісны трамвайӧн. Трамвай зэв ёна гримӧдіс кӧрт визя туйӧд. Сійӧ мунігмозыс пыр дзольӧдчӧ-звӧнитӧ, мед ветлысь-мунысьяс видзчысясны, кежасны. Мукӧддырйи трамвайӧс пановтас автомобиль, жургигтырйи. Васюк пыр ӧшиньӧдыс видзӧдіс, шензис. Керкаясыс гырысьӧсь, уна судаӧсь, каменнӧйӧсь. Сэні уна пӧлӧс удж нуӧданінъяс, гырысь лавкаяс.

Моски кузяыс жуӧны ӧтарӧ-мӧдарӧ йӧзыс. Улича помъясын сулалісны милиционеръяс.

Майбыров ая-пиа плӧщадь помӧ чеччисны трамвайысь. Сэні вӧлі базар. Уна быдсяматор сэні вузалісны. Найӧ милиционерлысь юалісны Гоголевскӧй переулок.

— Мунӧй веськыда тайӧ уличаӧд, мӧд переулокын, шуйгавылас, — шуис милиционер. Збыль сідзи вӧлӧма: мыйӧн мӧд переулокӧ воисны, пельӧссьыс гижӧд пӧвтор аддзисны: «Гоголевскӧй переулок».

Переулок вӧлі зэв ичӧтик: кызь кымын керка сӧмын сэні вӧлі. Быд керка бердын сулалӧ вӧлі пӧнар, сэні № пас быд керкалӧн.

Майбыров ая-пиалы регыд сюри тӧдсаныслӧн керка пасныс: № 15. Ӧградаас пырӧм мысти юалісны патера нумерсӧ. Ӧдзӧс дорас звӧнитісны электрическӧй звонокӧн. Ӧдзӧс восьтіс ачыс, тӧдсаныс. Сылы зэв нимкодь лои, Майбыровӧс аддзис да. Сы ордын сэсся Васюк батьыскӧд олісны патераын гортас мунтӧдз.