ПОШТА ВЫЛЫН

Петыр Семӧлы вель дыр лои карын овны. Мед гортас весьшӧрӧ оз виччысьны, гижис юӧртор. Гижӧд сюйис конвертӧ, вылас гижис адрес. Гижӧдсӧ мӧдӧдіс заказнӧйӧн, мед оз вош. Муніс пошта вылӧ, ньӧбис марка, ляскис письмӧ шӧрас, гижис «заказное» да сетіс сэтчӧ. Сэні сылы сетісны квитанция (кырымалӧм кабала) деньга босьтӧм йылысь.

— Васюк, гашкӧ гажыд петӧ телеграп видзӧдлыны, — Петыр Семӧ шуис пиыслы, пошта вылысь петігас.

— Дерт, петӧ. Вай петкӧдлы, — шуис Васюк.

Телеграп вылын гоз-мӧд морт торъя кабалаяс вылӧ гижалӧны телеграммаяс.

— Телеграммаыд ёна ӧдйӧ мунӧ письмӧсьыд. Час-мӧдӧн воас миянӧдз. Сӧмын уна гижны оз позь, зэв дона да. Быд кывйысь лоӧ мынтысьны, — висьтавліс батьыс Васюклы. Гижалӧм кабалаяссӧ йӧз мыччалісны ӧшиньӧ телеграписткалы. Сійӧ налы гижӧд (рӧсписка) сеталіс.