КӦРТ ТУЙ

Ӧтчыд Петыр Семӧ мӧдӧдчис карӧ, могӧн. Васюк тшӧтш вӧзйысьӧ: «Батьӧ, ме карад тшӧтш ветла, зэв гаж петӧ карсӧ видзӧдлыны да».

— Позьӧ, ветлам, — шуӧ бать. Васюк нимкодьысла ёна чеччаліс, чиктыліс.

Мӧд лун зэв водз Петыр Семӧ Васюккӧд мунісны кӧрт туй станцияӧ. Сэтчӧдз 8 верст вӧлі. Станцияыс шусьӧ вокзалӧн. Поезд эз на вӧв. Петыр Семӧ сувтіс мукӧд бӧр вылӧ кассаысь билет ньӧбны. Регыд ичӧтик ӧшиньӧд кутісны билетъяс вузавны. Петыр Семӧ Васюккӧд билетъясӧн петісны машина сувтанін весьтас. Сэні зэв уна виччысьысь нин вӧлі. Коді кӧлуйяс выланыс, коді скамъяяс вылӧ пуксялісны. Ӧти здук мысти кыліс тутӧстӧм. Сэсся тыдовтчис паровоз, зэв кыз трубаӧдыс пуркйӧдлӧ сьӧд тшын, сы бӧрын уна вагонъяс ӧти-мӧд бӧрся кыссисны. Медводдза вагоныс эз вӧв мукӧдыс кодь. Сійӧ вӧлӧма кӧлуй новлӧдлан вагон, ӧшиньтӧм, зэв ыджыд вешталана ӧдзӧса. Васюк батьыскӧд пуксисны ӧшиня, йӧз ветлан вагонӧ.

Поезд мунігчӧжыс Васюк видзӧдіс ӧшиньӧдыс. Уна муяс, сиктъяс, вӧръяс сійӧ аддзыліс.

Кӧрт туй пӧлӧныс сулалӧны телеграф сюръяяс. Васюклы кажитчӧ, быттьӧ сійӧ сюръяясыс паныд сылы котӧртӧны. Туй пӧлӧнсьыс вель уна стӧрӧж оланінъяс (будка) аддзыліс. Быд оланінысь петӧма стӧрӧж ёкмыльтӧм плагӧн. Сійӧ сідзи петкӧдлӧ мунысьяслы: «Позьӧ пӧ мунны, быдлаті туй — бур». Туй кӧ кыткӧ торксьӧма, водзӧ кӧ оз позь мунны, сэки петӧ сійӧ вылӧ лэптӧм паськӧдӧм гӧрд плагӧн. Машинанас вӧдитчысьыс мыйӧн аддзас сэтшӧм плагтӧ, пыр сувтӧдас поезд.

Машина грымӧдӧ-мунӧ ӧдйӧ. Кондуктор видлаліс билетъяс. Васюк видзӧдӧ да: кӧрт визьясыс туй вывсьыс зэв унала ног визьйӧдлӧмаӧсь. Налӧн мунан поезд визьысь визьӧ вуджӧ. Вӧлӧм, туйыд уналаӧ мунӧ.

Тыдовтчис мӧд станция, сэсянь тӧвар тыра вагонъяс вӧрзьӧдчӧны. Паровоз бара кутіс горзыны-тутсыны станцияас воигӧн.