СКОД

Крестьяналӧн видз-му удж эштӧма. Быд асыв кылӧ вартан шыяс гумла доръясын.

Ӧти вӧскресенньӧӧ таркӧдісны крестьянаӧс скод вылӧ. Надзӧникӧн локталӧны, чукӧртчалӧны, ӧтитор-мӧдтор йылысь сёрнитӧны: турун-нянь воӧм-артмӧм йылысь, медся ёна талунъя скод йылысь.

Со локтӧ Исполкомса председатель, сыкӧд тшӧтш — карса морт.

Председатель восьтіс скӧд. Медвойдӧр крестьяналы сійӧ висьталіс: «Граждана, тіян нянь таво бура воис, ставыс нин идралӧма, эштӧмаӧсь уджъяс. Ӧні колӧ мӧвпыштны кар йылысь, тшыг йӧз йылысь. Сы вӧсна гӧсударство пукталіс налогъяс. Миянлы оз ков сэтысь дӧзмыны петитчыны. Кодлысь мыйта корӧны, колӧ мынтыны. Сытӧг оз вермы государство ёнмыны. Налогъяс быдӧнлы пуктӧма овмӧс серти».

Сэсся лыддисны дорвыв пас, кодлы мыйта налог пуктӧма. Лыбис зык. Озырджыкъяс дӧзмисны, унджык налы пуктӧмаӧсь да.

Дыр ызгисны скод вылын. Сэсся шуисны бӧрйыны гӧльджык грамотнӧйджык крестьянаӧс видлавны списоксӧ да овмӧс серти быдӧнлы налог сюявны. Сы бӧрын надзӧникӧн бӧр разӧдчалісны.