МАЙБЫРОВ ПЕТЫР СЕМӦЛӦН ОЛӦМ РЕВОЛЮЦИЯ БӦРЫН

Революцияӧдз Майбыровлӧн зэв гӧля олісны. Медъёна сёйис найӧс асьнысӧ омӧльтӧмыс, быдӧнысь полӧмыс.

Быд начальствоысь, быд югыд кизяысь тіралісны. Сэсся сёйис пемыдлунныс: вӧліны неграмотнӧйӧсь, челядь кодьӧсь.

Сар дырся война вылӧ нуисны Петыр Семӧӧс косясьны. Наталля колис посни челядькӧд корысь нисьӧ сетысь. Война вылын Семӧ веськалі пленӧ, немечьяс ордӧ. Сэні сійӧ уна буртор аддзис, налӧн олӧмыс сьӧлӧм вылас воис, казяліс, бур олӧм вӧлӧма велӧдчӧм помысь. Быд письмӧын гижис гӧтырыслы: «Наталля, челядьнымӧс колӧ велӧдны школаын».

Гымыштіс революция. Уджалысь йӧз вӧтлісны сарӧс, чиновникъясӧс, озыр йӧзӧс.

Крестьяна помещикъяслысь мырддялісны видз-му. Крестьяналӧн, гӧль йӧзлӧн олӧм вежсис, лои кокниджык, быдӧн личмуніны. Петыр Семӧлӧн тшӧтш тыр морӧсӧн лолыштісны. Овмӧс кыптыны кутіс. Олӧм кокняммис налӧн.

Петыр Семӧлы эськӧ пыр гӧтырыс муса вӧлі да, сӧмын эз кужлы видзныс, дӧзьӧритныс аслас пемыдлуннас.

Ӧні гӧтырсӧ бур пыдди пуктіс, бура, меліа видзис, некор нин эз пиняв. Пыр тӧждысис Васюк велӧдчӧм йылысь. Ачыс кутіс лыддьысьны, медъёна видз-му овмӧс кыпӧдӧм йылысь нигаяс. Зэв радейтіс Петыр Семӧ газет лыддьыны. Сӧмын шоча воліс сэтчӧ газетъясыс-а.

Наталля революцияӧдз вӧлі дзик пемыд коньӧр кодь ань: лыддьысьны-артавны немтор эз кужлы. Ӧні сылӧн вывті гаж петны кутіс мортӧ воштысьны. Лёка регыдӧн велӧдчис лыддьысьны, кутіс ветлӧдлыны лыддьысянінӧ, скод вылӧ, собранньӧяс вылӧ. Унаысь шулас ачыс: — «Ме дзик мӧдысь чужи».

Мыйла нӧ сідзи шуӧ?