КЫДЗИ ЙӦЗ ВОИСНЫ ПЛУГӦДЗ

Ми тӧдам нин, медводдза йӧз сёйлісны мый сюрлі на киподулӧ: посни зверъясӧс, ракъясӧс, вотӧсъяс, турун, и быдсяма гагъяссӧ, кор вывті пӧтӧсь, кор дзик тшыгӧсь.

Дерт, тадзи дыр оз вермыны пӧткӧдчыны йӧз. Лои кынӧмпӧт мӧд ногӧн корсьны. Увйӧсь бедьясӧн кутісны кокавны му да коявны сэтчӧ кӧйдыс. Дыр мысти коркӧ гӧгӧрвоисны лӧсьӧдны зыр, кокан. Зырйӧн-коканӧн удж кокняммисджык. Дыр лои уджавны тадзи, дыр эз гӧгӧрвоны гӧртӧ лӧсьӧдны.

Видлалӧй ёна гӧртӧ: со — вож, гӧр юр, со — гартлӧма гӧр ньӧр, росока. Росока помас амысьяс, веськыдладорас шабала, амысьясыд бурӧтш зырланьӧ мунӧны. Амысь мусӧ кыпӧдӧ, шабала путкыльтӧ.

Та серти кӧ: увъя беддьыд, коканыд зыркӧд лоӧны бать да мам гӧрйыдлӧн.

Гӧр вӧлі бур плуг лӧсьӧдтӧдз. Ӧні плугыд гӧртӧ кутіс вӧтлыны быдлаысь. Гӧрйыд му пласттӧ оз бергӧд, турун-ёг вужтӧ оз виав, пыдіті оз босьт мутӧ, оз гудрав.

Плугнад гӧрӧмтӧ видзӧдлӧй. Сійӧ ёна му пласттӧ путкыльтӧ, турун-ёг вужтӧ вылӧ лэптӧ, турунсӧ пласт улас сюйӧ. Гӧрныд кокни, сӧмын вӧвтӧ веськӧдлы, весиг челядь вермӧны сійӧн гӧрны.

Плуг — рӧдня гӧрлы. Плуг — пи гӧрлӧн. Сӧмын пиыс ылӧ колис мамсӧ. Босьтам паськыдінъясын электричество вына плугъясӧн гӧрӧмъястӧ. Сэні вӧлӧн оз нин гӧрны-кӧдзны. Сэтшӧм плугъяснад гӧрысьяс, майбыр, оз бара мудзны, воддза гӧрысьяс моз.