ЮРСИГУЫСЬ

Мича сера бордъяса бобув жбыръялӧ, лэбалӧ дзоридзысь дзоридзӧ, пӧткӧдчӧ найӧ чӧскыд дукнас. Лӧсьыд, гажа сылы шонді водзын шонтысьны. Чавканъяс потшӧс вылын жарсьыс вомнысӧ паськӧдӧмаӧсь, — бордъяснысӧ шевгӧдӧмаӧсь. Гагъяслы, бобувъяслы, номъяслы эськӧ жарыс и колӧ да.

Со, чиркъяс сьылӧны, пуксьӧмаӧсь турун идз вылӧ да. Со тонӧ, пуяс весьтын дугдывтӧг лэбалӧ юрсигуысь аслас югъялан бордъяснас. Лӧсьыда ӧмӧй оз гӧграв, — лэбав юр водзад, быттьӧ йӧктӧ зэв лӧсьыда чиркъяс ворсӧм шыӧ.

— Лоӧ сыкӧд тӧдмасьны, — мӧвпалӧ бобув: — кутшӧм сійӧ мича, йӧктӧ кутшӧм лӧсьыда. Колӧ сылысь менам велӧдчыны йӧктыны.

Гӧгӧр асьсӧ видзӧдліс бобув, мед пӧ воа жӧ сьӧлӧм вылас, мед пӧ ог жӧ янав. Сэсся лэбзис сы дінӧ.

Мыйӧн матысмыны кутіс, надзмӧдчис чуймӧмысла, сэсся ӧдйӧ бӧр бергӧдчис.

Юрсигуысьыд, вӧлӧм, вӧтлысьӧ гутъяс-номъяс бӧрся, дай найӧс ньылалӧ.

«Нинӧм шуны бура тай, вӧлӧм, йӧктӧ, бергалӧ! — мӧвпыштіс бобув: — ме кӧсйи сылысь велӧдчыны йӧктыны. Со, сійӧ кутшӧм вӧлӧма, мый, вӧлӧм, керӧ!»