БОБУВ

Лэбаліс, лэбаліс жунган гаг, сэсся пуксис шойччыны льӧм куст вылӧ. Пукалӧ, гӧгӧр видзӧдӧ. Ӧти кор вылысь сійӧ аддзис кутшӧмкӧ аддзывлытӧм гагйӧс. Гаг зэв горша сёйӧ корсӧ, уна нин сёйӧма.

Жунган гаг шензьӧ гаг вылӧ, тӧдӧдны кӧсйӧ нимсӧ. Матысмыштіс сы дінӧ, видза видзис:

— Олан вылан гаг!

— Мырсян олан! — шыасис гаг. — Абу жӧ ме гаг, ме вегыль^Лёльӧ./^ да.

— Вегыль? Ме тай нӧ эг на тӧдлывлы некодӧс сэтшӧм нимасӧ! — шуис жунган.

— Збыль, збыль! Ӧні ме вегыль на, лун-мӧд мысти ме лоа акань кодь, сы бӧрын мича бобулӧ пӧра.

Жунган гаг быдӧн чуймис.

— Вот и дивӧ! Тэ нӧ, бур аньӧй, вегыльӧй, он-ӧ мекӧд шмонит?

— Ог жӧ шмонит. Волы, колӧкӧ, лун-мӧд мысти, сэки ачыд аддзан.

— Дзик вола, — шуис жунган, лэбигмозыс.

Кык лун мысти бара лэбис жунган гагыд пу вылад, вегыльӧс видлыны.

Гӧгӧр видзӧдӧ — вегыльлӧн абу весиг дукыс.

— Аттӧ, ылӧдіс вегыльыд; лоӧ бӧр зільджыка лэбны.

Шуигмозыс син вылас уси гыркса пытшкӧса кыдз пу. Сэні куйлӧ кутшӧмкӧ кузьмӧс, ёсьтӧм пома, кольк кодь тор.

— Мый нӧ татшӧм дивӧыс? — брунгӧ жунган гаг.

— Тайӧ ме, кодкӧ лунся вегыльыд, со, ӧні ме акань нин, — шыасис вегыльыд.

— Сё дивӧ тай! Дырӧ нӧ бобулад он пӧр? — юаліс жунган.

— Часлы, виччысьлы, лоа и бобув. Тэ волывлы быд лун, аслад синнад аддзылан.

Лун-мӧд мысьт жунган гаг бара лэбис кыдз пу дорӧ. Кыдз пу дін вылын пукалӧ зэв мича, ыджыд бобув, бордъяссӧ веськӧдлӧ, лӧсьӧдлӧ шонді водзын.

— Олан-вылан, жунган! — шыасис бобув. — Буретш кадӧ локтін, ме сӧмын талун асывводзӧ аканьысь петі бобулӧ, кӧсъя лэблыны дзоридзьяс вылӧ сёйыштны-юыштны чӧскыд сёянсӧ. Кутшӧмджыка тэныд сьӧлӧм вылад воӧ менам паськӧмӧй?

— Вывті мича! — шуис гаг.

Збыльысь мича вӧлі бобулыс.