КОДЗУВКОТЪЯС

Прокӧ Пилякӧд кайисны тшак вотны. Ветлӧдлӧны быд пу костӧд, быд мыр бердӧд, корсялӧны сьӧд гобъяс, гӧрд гобъяс. Вывті уна тшакыс петӧма, оз вевъявны весиг вотнысӧ бур йӧз. Со, муртсаӧн пестеръястӧ, чуманъястӧ тыртісны Пиля Прокӧкӧд.

«Сэсся пӧ позьӧ куритчыштны», шуӧны найӧ. Вель дыр пукалісны куритчигмозныс. Сэсся бара тшак корсявны мӧдӧны, асьныс шыбитісны кок уланыс чигарка помнысӧ. Сэні вӧлӧма кодзувкот поз. Чигарка помсьыд кос лысъясыд да ув торъясыд ӧзйисны. Кодзувкотъяс шызисны: котралӧны ӧтарӧ-мӧдарӧ. Бикӧд оз позь шмонитны. Тӧдӧны ӧд, налӧн керканыс вӧчӧма дзоньнас кос лысъясысь, коръясысь, ньӧръясысь, вермас ӧти дукӧн кушӧдз сотчыны. Сӧмын кодзувкотъяс абу полысьӧсь. Ставныс ӧтвылысь уськӧдчисны чигарка пом вылад, веськыда би вылас. Мырсьӧны, кусӧдчӧны мӧда-мӧд вежмӧн, горзӧны: «энӧ пӧ полӧ, вокъяс, эн лэдзӧ бисӧ паськавны!»

Уна кодзувкот ассьыс ловсӧ сэтчӧ пуктіс. Коді коктӧм, коді синтӧм коляліны повтӧмъяс. Керканыс ӧд дзонь жӧ коли, немтор эз лэдзны сотчыны.