ДЗОРИДЗ

Быд быдманторлӧн: пулӧн, турунлӧн, няньлӧн, шобділӧн зэв колантор дзоридз. Дзоридзын артмӧ кӧйдыс. Кӧйдысысь быдмӧ быдсяма быдмантор. Кӧйдыстӧг немтор оз быдмы.

Вайӧ босьтамӧй лежнӧг дзоридз да гӧгӧр видлаламӧй. Со, дзоридз пытшкас гӧгӧр чурвидзӧны виж шмака пома сіяс. Дзик дзоридз шӧрас пыдысянь кайӧны мӧд пӧлӧс сіяс. Дзоридзсӧ кӧ вундан, кузяла ногыс зэв лӧсьыда тыдалӧны кыкнан пӧлӧс сіясыс. Шӧрса сіясыс пыдӧ, пытшкӧ пырӧмӧн, паськалӧмӧн помасьӧны. Виж шмакъясас эм бус. Мыйӧн шмакъясыс воасны, потласьӧны, сэки бусыс киссьӧ дзоридз шӧрса сіас юр выланыс. Шӧрса сіясыс восьса пытшкӧсас. Сэтчӧ, мыйӧн бусыс веськалӧ, лэччӧ пыдӧсӧдзыс. Пыдӧсас сэсся артмӧ кӧйдыс. Сійӧ бустӧгыс кӧйдыс оз вермы лоны. Бусыс кӧ мӧд дзоридзысь веськалас, сэк кӧйдыс бурджык лоӧ. Дзоридзысь дзоридзӧ буссӧ новлӧдлӧны бобувъяс, малязіяс, тӧв.

Гагъяс дзоридзысь дзоридзӧ буссӧ новлӧдлӧны кокъяснаныс, кынӧмнаныс. Дзоридз уна сикас, сӧмын быд дзоридзлӧн эм гӧгӧр шмака пома сіяс, дзоридз шӧрса сіяс. Шочиник дзоридзьяслӧн овлӧ сӧмын куш коръясыс (лепескияс). Сэтшӧм дзоридзьяслӧн кӧйдыс оз овлы (тшак, нитш). Налӧн быдлаын кӧйдыс пыдди эмӧсь зэв поснидик чулькъяс, шыдӧс кодьӧсь. Сійӧ чулькъяссьыс найӧ йывмӧны.