ВӦР

Вӧрын уна пӧлӧс пу эм. Ӧти пӧлӧс пуяс коръяӧсь: кыдз, пипу, бадь, тупу, ловпу.

Налӧн тӧлын коръяс гылалӧны, куш ньӧръяс кежысь сулалӧны тӧвбыд. Мӧд пӧлӧс пуяс лыскаӧсь: коз, пожӧм, ньыв. Найӧ тӧвбыд ӧткодьӧсь, — вежӧсь сулалӧны. Коръя пуяса вӧр шусьӧ раскӧн. Лыска пуяса вӧр шусьӧ ягӧн, пармаӧн да. Вӧр помысь морт ыджыд бур босьтӧ. Пуысь вӧчӧ сійӧ керка, карта. Шонтӧ керкасӧ пескӧн. Керка пытшкас ставыс жӧ пуысь вӧчӧма: пызанъяс, улӧсыс, лабичыс, крӧватьыс. Пыжыс, доддьыс, пиняыс, гӧрйыс — ставыс пуысь. Сиртӧ, дьӧгӧдьтӧ вийӧдӧ бара жӧ пуысь. Весиг кабалатӧ вӧчӧны пуысь. Весиг кырссьыс мыйта бур босьтӧны: кыӧны нинкӧм, перйӧны бон рӧгӧза вылӧ, кучик дубитӧны, вийӧдӧны дьӧгӧдь. Сюмӧдсьыд кымын пӧлӧс дозмук вӧчӧны.

Вӧрса пӧтка-зверыс мортлы сёянсӧ, шоныд кусӧ мыйта сетӧ. Вотӧсыд, тшакыд быдмӧ — ставыс сійӧ сёянӧ мортлы мунӧ. Тӧлын вӧр видзӧ кӧдзыдысь, гожӧмын шонді сотӧмысь. Весалӧ тшыкӧм воздук: сӧстӧм воздукӧн мортлы кокньыд, долыд лолавны.

Лыдтӧм-тшӧттӧм бурсӧ эськӧ вӧрыд сетӧ мортлы да, оз быдӧн гӧгӧрвоны сы йылысь-а. Вежӧртӧм йӧзыд ньӧти оз видзны, оз жалитны вӧртӧ. Вӧрӧд мунігмоз черӧн ӧтарӧ «сап», мӧдарӧ «сап» — пуястӧ пӧрлӧдлӧны; аслыс эськӧ оз ков пуыс. Сідзи пӧрлӧдлӧ сісьмӧм вылӧ. Оз мӧвпышт сэтшӧм йӧй мортыс, кутшӧм дыр лои налы быдмыны, кымын дас во пуӧдз воштысьны. Вежӧра-мывкыда йӧз ёна видзӧны вӧртӧ. Юклӧмаӧсь гоз-мӧд пельӧ, да вочасӧн пӧрӧдӧны. Мукӧдласьыс быдтӧны, оз вӧрзьӧдны.