ТУЛЫС ТАЙ ЛОКТӦ

Быд керка вылысь шор моз визувтӧ войтва. Туйяс сьӧдӧдӧмаӧсь. Быд ӧшинюлысь мудӧдъяс тыдовтчӧмаӧсь. Кӧнсюрӧ вежинъяс мыччасьӧны. Со, еджыд юра Машӧ мудӧд вылын лыаысь ляти гудралӧма да шлячкӧдӧ чачаяс. То, пос помын Ӧдюк Ануккӧд кӧмтӧмӧсь, чеччалӧны пӧвтор вылын. Васюк Ёгушкӧд бӧрӧзда помӧны, лӧсьӧдӧны мельнича. Миртуй вомӧн, мӧд бӧрӧздаын пыжъяс, паракодъяс лэдзалӧмаӧсь, ворсӧны. Став челядьыс кӧм ни пась. Туй шӧрын петук «кот-кот-кот» — чуксалӧ курӧгъясӧс ас дінас, мыйкӧ сюрӧма да. Весиг каньыд тшӧтш петӧма, пос вылын куткырвидзӧ-пукалӧ. Гидъясын ыжъяслӧн, мӧсъяслӧн баксӧм шы кылӧ, вӧзйысьӧны вӧля вылӧ. Керкаясын швачкӧны-кыӧны. Кодкӧ, кылӧ, ӧшинь дорын сяргӧ — дзавйӧ сюри. Школа ӧшиньяс восьталӧмаӧсь. Сэні мыччасьӧны, малязіяс моз ызгӧны-дзольгӧны челядь. Гӧгӧр шоръяс бузгӧны. Гажа жӧ нин быдӧнлы тулыснад.