АСКИ ЛЕНИНӦС КАЗЬТЫЛАМ

— Тӧдан бара кок шытӧ Мишалысь, — шуӧ Маръя тьӧт: — ӧдйӧ пӧдлав ӧдзӧссӧ, ӧдйӧ! Кӧдзыдсӧ мыйда пыртін.

Миша кӧдзыд руыскӧд тшӧтш котӧртіс кӧтшас пельӧсӧдз.

— Кӧн нӧ Павелыд? — пристук вылӧ чеччыштігмоз юаліс Миша.

— Со тай паччӧр вылын, кынмӧма да, — шуӧ Маръя тьӧт. Ачыс паччӧр дорын жӧ швыргӧ-печкӧ.

— Мыйла нӧ школаад эн волы, — юалӧ Миша.

— Муртса на мельничаысь локті, — шуис Павел.

— Аски оз велӧдны, корисны нардомӧ, — висьтавлӧ Миша ёртыслы.

— Кутшӧм нин бара праздник тіян лоӧма? — юалӧ Маръя тьӧт.

— Аски кутам казьтывны Ленинлысь кулан лунсӧ. Унаӧн кутасны сы йылысь висьтавлыны, бӧрынас спектакль лоӧ пионеръяслӧн, — висьтавлӧ Миша.

— Мамӧ, Лениныд уна жӧ бур вӧчӧма гӧльыдлы, уджалысьыдлы, крестьянаыдлы! Пыр на понда косясьӧма, пессьӧма озыръясыдкӧд.

— Озыръясыд да попъясыд ӧд асьсӧ видӧны жӧ, — шуӧ Маръя.

— Найӧ, дерт, видасны, налысь власьтсӧ мырддисны да. Некытчӧ найӧс ӧні оз сибӧдны. Маръя тьӧт, аски нардомад тшӧтш волы, сэні та йылысь ставсӧ висьталасны, — зэв сьӧлӧмсьыс нуӧдӧ Миша.

— Но, мокасьтӧ челядь, — сералӧ Маръя: — гашкӧ, ті сэсся менӧ спектакасьны тшӧтш кутанныд велӧдны да? «Союз молодёжаныд» тшӧтш гижанныд да? Лоӧ, тыдалӧ, ветлыны видзӧдлыны тіянлысь кикимеритчӧмнытӧ.