ВУЖЪЯ ДОДДЬӦН ДА ГӦГЫЛЯ ДОДДЬӦН

Митялӧн батьыс мӧдӧ вӧрӧ: керка кер чукӧртны. Пармаыс ылын, ю йылын. Керсӧ колӧ ю бердӧ матыстны, пуръявны да кылӧдны. Батьыс шуӧ Васьӧлы: «Тэ, — шуӧ: — вӧвнад берегӧдыс мун. Пыжнас ми Палӧкӧд кывтам. Кӧлуйным бара ставыс-ӧ лои-а?» — «Батьӧ, — кылӧ, шуӧ ичӧтик Митьӧ: — телегатӧ тай нӧ вунӧдінныд, — мыйӧн нӧ кыскаланныд кертӧ?» Батьыс серӧктіс: — «Сэн ӧд, — шуӧ: — телеганад оз шогмы кыскасьныд».

— Мыйӧн нӧ эськӧ?

— Вуж доддьӧн.

— Кутшӧм нӧ, мамӧ, сійӧ вуж доддьыс? — юасьӧ Митьӧ батьысъяс мунӧм бӧрын. — Мыйла нӧ вуж додьнас керсӧ кыскалӧны?

— Телеганас ӧд ю йылад некыдз кайныд, туйыс абу да, сӧмын подӧн, верзьӧмӧн письтан. Керсӧ чукӧртны телеганад сэні некыдз жӧ: быдлаын мыльк да гуран, мыр да... лӧп да. Сэн вуж доддьӧн кыскасьӧны куш дырйиыд: кык коз пӧрӧдасны, крука вужъясаӧс, сэсся сійӧс шыльӧдасны да крукъяссӧ письӧн кӧртавласны, улісӧ лӧсыштӧма. Вот тэныд и вуж додь. Дерт, эськӧ вӧлыдлы сьӧкыд да, мый керан? Сэсся некыдз оз позь да.

— Мамӧ, вӧлӧсьтъясас нӧ войдӧр сідз жӧ кыскасьлӧмаӧсь, кор вӧрыс уна на вӧлӧма да туйыс омӧль?

— Сідз, дерт. Телегаясыд ӧд неважӧн на лоины. Дедыд висьтавлывліс: важӧн пӧ тӧв и гожӧм кыскасьлӧмаӧсь доддьӧн да вуж доддьӧн. Телегаястӧ мӧдысьджык нин кутісны вӧчны. Зэв ыджыд коз пу пӧ вужнас вӧлі пӧрӧдасны, да дінсьыс телега гӧгыль (кытш) ыджда чӧлан быв лӧсаласны, да гӧгрӧса розьӧдасны шӧрӧдыс, сэсся чӧрс помӧ сюясны, да вылысас кык потш пуктасны. Сэтшӧм сэки и телегаыс вӧвлӧма.

— Быдсяма дивӧыд тай вӧвлӧма жӧ.