БЫДСӦН ВӦЧЧӦНЫ АС НОГНАНЫС

Вӧччӧмыд йӧзыдлы нэмысянь вӧлі муса. Быд йӧз ас ногнас вӧччӧ-а. Австралияса пасьтӧм йӧз сьӧраныс новлӧдлӧны еджыд сёй, виж да гӧрд краска да. Быд лун найӧ мавтӧны морӧснысӧ, пельпомнысӧ, чужӧмнысӧ да. Гырысьджык вежа лунъясӧ став туша тырнас серӧдчасны. Сьӧд чукыля юрсисьыныс быдсяма шмакъяссӧ (причёска) вӧчасны. Зэра дырйи, вушйӧм шогысь, мӧд ногӧн серӧдчӧны. Лежнӧгъясӧн, ракпань дорышӧн, чери пиньӧн да кырлӧдласны, серӧдласны вирӧдз яйнысӧ. Сэсся дойяссӧ мавтасны кутшӧмкӧ краскаӧн. Сідз сэсся и бурдас нэм кежаныс. Татшӧм серӧдӧмсӧ шуӧны татуировкаӧн. Кутшӧма эськӧ доймӧ, висьӧ яйыд да, вӧччӧм кузяыд да мичлун колӧм вӧснаыд тай быдсӧн сьӧлӧмас пыкӧны. Мукӧдлаас дикаръясыд ичӧтысяньыс вомдорнысӧ розьӧдӧны, сэсся розяс сюясны вӧснидик ёсьтор, да надзӧникӧн ыдждӧдӧны розьсӧ. Кымын ёна чургӧдчӧма налӧн льӧбныс, сымын мича налы кажитчӧ. Америкаса индеецъяс баситчӧны уна пӧлӧс гӧнъясӧн, розьӧдлӧны ныръяснысӧ, сэсся ӧшӧдлӧны розяс чунькытшъяс, лыяс да.

Войвывса йӧзлы оз позь пасьтӧм йӧз моз вӧччыны. Налы лоӧ юр вывсяньныс кокулӧдзныс звер куӧн пасьтасьны. Сэсся ёнджыка шоныд вӧснаыд лоӧ мырсьыны и.

Тӧдӧны тай эськӧ и войвывса аньясыд мичатӧ да. Парка маличаясад вурласны быдсяма сикас нойтӧ, тасавласны, серӧдасны — синмад чеччӧ быдӧн. Гырысь каръясын озыр йӧзыд вӧччӧны роч нойясӧн, шӧвкӧн, баркатӧн; выльысь-выль ногӧн да баскаысь-баскаӧ вурӧма. Ӧшласны быдлаӧ зарнитӧ: пеляд, чуняд, голяад, морӧсад.

Вӧччӧмыд быдсяма йӧзлы муса: озырлы и, гӧльлы и, велӧдчӧмлы и, велӧдчытӧмлы и, вежӧралы и йӧйлы.