МЕДВОДДЗА ЙӦЗЛӦН ПАСЬКӦМ

Мортыдлы ёна лоӧ видзчысьны шонді сотӧмсьыд, кӧдзыдсьыд, тӧвсьыд, зэрсьыд. Мукӧддырйиыс кӧть эськӧ чомсьыд он петав да, тшыг кынӧмыд тай вӧтлӧ. Дерт, эськӧ паськӧмыд морттӧ видзӧ, да паськӧмсӧ лӧсьӧдны бара жӧ уна вежӧр колӧ. А вежӧр медводдза йӧзлӧн вӧлі неыджыд. Коръяс кышаласны — косясьлӧны, дай омӧля шонтӧны. Ош-кӧинлӧн паськӧмыд шоныд, да найӧ вӧйӧсь, полысьӧсь, кыйныд найӧс абу кокни. Коркӧ эськӧ и кыйисны найӧс да, кульнытӧ некыдз: куш кинад ӧд он, буракӧ, куль, пурт-чер оз на вӧлі тӧдны-а. Сэсся, кыдзкӧ-мыйкӧ, ёсь изъясӧн да ракпаньясӧн кулисны жӧ. Лун-мӧд мысти кучикыд дукмис, гӧныс уси. Колӧ, вӧлӧмкӧ, кужны косьтыны-песны кучиктӧ. Сэсся, коркӧ дырӧн, кучиктӧ вӧчны велалісны жӧ. Дыр йӧзыд пасьтасисны звер куяснад. Дыр мӧд пӧлӧс паськӧмтӧ эз тӧдлыны. Шабді пышсьыд дӧратӧ кузя эз казявны вӧчныд. Ывла вылыд ӧд ачыс оз велӧд печкыныд-керныд. Мортыдлы аслыс вӧлі колӧ быдтор гӧгӧрвоны.