МЕДВОДДЗА ЙӦЗЛӦН ӦРУЖЙӦЯСНЫС

Медводдза йӧзлӧн юр вежӧрныс надзӧн вӧлі уджалӧ, дыр ӧружйӧястӧ вӧчавны эз гӧгӧрвоны. Кымыныськӧ эськӧ босьтлісны жӧ кианыс увъястӧ, бедьястӧ да, мыйдыра немтор эз гӧгӧрвоны вӧчны. Кузяӧн, дырӧн вӧлись велаліны ӧружйӧяссӧ лӧсьӧдавны.

Дырӧн гӧгӧрвоисны бедьястӧ — лӧсьыдджыкӧс, зоръястӧ — кызджыкӧс, изъястӧ — ёсьджыкӧс босьтны. Сэсся коркӧ зверъястӧ кинаныс пыдди пондісны кульны ракпаньясӧн. Пыр тадзи олӧмнысӧ надзӧникӧн, дырӧн кокньӧдісны асланыс вежӧрнаныс.

Кутісны тӧдны мыйсюрӧ: кутшӧмджык зверӧс корджык позьӧ вины; коді кӧні олӧ; кутшӧмӧс некор оз позь вӧрӧдны. Коркӧ сэсся велаліны бедьяс помӧ кӧртавлыны изъяс, ракпаньяс, лыяс. Кӧртӧдъяс пыддиыс вӧлі пу вужъяс, ньӧръяс, гартчан турунъяс. Мӧлӧт пыдди гӧгрӧс из кӧрталасны бедь помӧ. Сэтшӧм мӧлӧтнад кутісны изйысь вӧчавны выль ӧружйӧяс. Вӧснидик ёсь изъясысь артмис пурт, кызджыкъясысь — чер, зэв ёсьясысь — шыла. Пуртсӧ кузь бедь помӧ кӧрталісны — артмис шы. Сідзи пыр водзысь-водзӧ йӧзыд сюсьмисны да вежӧрсялісны.

Сы гӧгӧр кымын артмис ньӧв, пищаль.

Татшӧм из ӧружйӧясыс ӧні на сюралӧны гуясысь, му пытшкысь. Велӧдчӧм йӧз сэтшӧмторъяссӧ чукӧртӧны музейясӧ. Музейясыс эмӧсь Ленинградын, мукӧд каръясын и. Изъя ӧружйӧяснас вӧдитчан кадсӧ велӧдчӧм йӧз шуӧны «каменнӧй векӧн».